پاکستان19ویں سارک سمٹ کی میزبانی کرے گا:سیکرٹری خارجہ تہمینہ جنجوعہ

271

اسلام آباد، 07 دسمبر (اے پی پی): سیکریٹری خارجہ تہمینہ جنجوعہ نے کہا ہے کہ پاکستان کی حکومت

اور عوام سارک کے مقاصد کے حصول کے لئے پُرعزم ہیں ، خطے میں معاشی سرگرمیوں کےفروغ کے لئے ہمیں رکاوٹوں کو ہٹانا

پڑے گا۔

دفتر خارجہ میں  34ویں سارک چارٹر ڈے کے حوالے سے منعقدہ تقریب سے خطاب کرتے تہمینہ جنجوعہ کا کہنا تھا کہ  سارک میں اتار چڑھاؤ ہوا مگر سارک مستحکم ہے۔ سارک کوخطے کےلوگوں کی بہتری کے وعدے کے تحت بنایا گیا تھا اور آج کا دن ہمیں یہ یاد دہانی کراتا ہے کہ 1.7 ارب کی آبادی پر مشتمل اس خطے میں ترقی و خوشحالی کے لئے مل جُل کر کوششیں کرنا ہوں گی۔

انہوں نے کہا بد قسمتی سے سارک نے اپنی ترقی کے مقاصد حاصل نہیں کیے۔ تاہم ہمیں معیشت، توانائی کے بنیادی ڈھانچے اور عوامی روابط کے شعبوں میں تعاون کو فروغ دینےکے لئے کوششیں تیز کرنی ہیں۔ سیکریٹری خارجہ نے یہ بات زور دے کر کہی کہ توانائی کے شعبے میں خاص طور پر قابل تجدید توانائی (renewable energy) کے شعبے میں تعاون، سارک رکن ممالک میں رابطوں کو بھی بڑھا سکتاہے اور مشترکہ مسائل سے نمٹنے میں مدد بھی دے سکتا ہے۔ بدقسمتی سے جنوبی ایشیا دنیا کا غریب ترین خطہ ہے، ہمیں اس میں ترقی کے لئے مل کر آگے بڑھنا ہے۔

سارک چیمبر آف کامرس کے حوالے سے انہوں نے کہا چیمبر کا ہیڈ آفس پاکستان میں ہے جس کے لئےپاکستان اپنا مکمل تعاون جاری رکھے گا۔ پاکستان سارک چارٹر کے اصولوں پر مکمل یقین رکھتا ہے۔

تہمینہ جنجوعہ نے بتایا کہ پاکستان انیسویں سارک سمٹ کی میزبانی کرے گا۔ پاکستان کی حکومت اورعوام سارک کے مقاصد کے حصول میں پُرعزم ہیں۔

تقریب میں سارک چیمبر اُف کامرس و انڈسٹری کے صدر/ چیئرمین (Ruwan Edirisinghe) رووان ایدریسنگھے نے تقریب میں خصوصی شرکت کی۔ اپنے خطاب میں انہوں نے کہا کہ مستقبل میں جنوبی ایشیاء خطے کا معاشی سرگرمیوں کا مرکز ہوگا جس کےلئے تمام رکن ممالک کو ایک ساتھ آگے بڑھنا ہوگا۔ انہوں نے مزید کہا کہ خطے میں معاشی سرگرمیوں کےفروغ کے لئے ہمیں رکاوٹوں کو ہٹانا پڑے گا۔

دفتر خارجہ کے زیر اہتمام ہونے والی 34ویں سارک چارٹر ڈے تقریب میں رکن ممالک کے سفراْ سمیت مبصر ممالک کے سفیروں اور نمائندوں نے شرکت کی۔ یہاں یہ بات قابل ذکر ہے کہ بھارت کی جانب سے ہائی کمیشنر شریک نہیں ہوئے بلکہ اسلام آباد میں تعینات بھارتی سیکریٹری نے تقریب میں شرکت کی۔

اے پی پی/حمزہ/فرح

وی این ایس اسلام آباد