صدر مملکت نے بحرین کے ایوانِ بالا شوریٰ کونسل کے چیئر مین علی بن صالح الصالح سے بات چیت کرتے ہوۓ کہا کہ دونوں ملکوں کے درمیان تجارت کا حجم صلاحیت سے کم ہے اس میں مزید اضافے پر توجہ دینے کی ضرورت ہے۔ اس سلسلے میں پاکستان بحرینی سرمایہ کاروں کا خیر مقدم کرے گا۔ انھوں نے کہا کہ بحرینی سرمایہ کارتوانائی اور انفراسٹرکچر کے شعبے میں پاکستان میں سرمایہ کاری کے مواقع سے فائدہ اٹھا سکتے ہیں۔
اس موقع پر چیئرمین سینیٹ رضا ربانی اور سینیٹر حمداللہ سمیت اعلیٰ حکام بھی موجود تھے۔
صدر مملکت نے کہا کہ پاکستانی ہنر مندوں نے بحرین کی ترقی میں اہم کردار ادا کیا ہے۔ ہم توقع کرتے ہیں کہ ہمارے ہنر مند آئندہ بھی اپنا مثبت اور مفید کردار ادا کر تے رہیں گے۔
صدر مملکت نے زندگی کے مختلف شعبوں میں بحرین کے طلبہ اور اہل کاروں کو تعاون کی پیشکش بھی کی۔ صدر مملکت نے زندگی کے مختلف شعبوں میں ماہرین کے تبادلے پر مسرت کا اظہار کرتے ہوئے کہا کہ مستقبل میں اس میں مزید اضافہ کیا جائے تاکہ دونوں ملکوں کے درمیان مشترکہ تجارتی اور صنعتی شعبوں میں مشترکہ منصوبے شروع کیے جاسکیں۔ انھوں نے اس موقع پر بحرین کے بادشاہ، ولی عہد ، حکومت اور عوام کے لیے نیک خواہشات کا اظہار کیا۔
صدر مملکت نے کہا کہ چیئرمین سینیٹ رضا ربانی عالمی برادری خاص طور پر اسلامی ممالک کے ساتھ پاکستان کے تعلقات کے فروغ کے لیے بڑی محنت سے کام کرتے ہیں جو قابلِ تعریف ہے۔
بحرینی ایوان بالا کے چیئرمین علی بن صالح الصالح نے اس موقع پر بحرین کے بادشاہ اور ولی عہد کی طرف سے صدر مملکت کو نیک تمناﺅں کا پیغام پہنچایا اور کہا کہ دونوں ممالک کے درمیان انتہائی قریبی اور برادرانہ تعلقات ہیں۔ انھوں نے مزید کہا کہ نرسنگ یونیورسٹی بحرین کی طرف سے پاکستان کے لیے ایک خصوصی تحفہ ہے جس سے باہمی تعاون میں مزید وسعت پیدا ہوگی۔ انھوں نے اس موقع پر پاک چین اقتصادی راہداری سے استفادہ کی خواہش بھی ظاہر کی۔ انھوں نے کہا کہ پاکستان بحرین ہی نہیں بلکہ پوری اسلامی دنیا کے لیے نہایت اہم ملک ہے۔
اے پی پی / خالداعوان / حمزہ /
