اسلام آباد،17 دسمبر(اے پی پی): وفاقی وزیر اطلاعات چوہدری فواد حسین نے کہا ہے کہ مرزا غالب کا یوم پیدائش اس سال شایان شان طریقے سے منایا جائے گا، خواہش ہے نوجوان نسل مرزا غالب کی شخصیت اور فن سے روشناس ہوں۔
برصغیر کے عظیم شاعر مرزا غالب کے یوم پیدائش کے موقع پر تقریبات اور مختلف پروگرامز کو حتمی شکل دینے کے لیے وزارت اطلاعات میں وفاقی وزیر اطلاعات کی زیر صدارت اعلی سطح اجلاس منعقد ہوا ،اس موقع پر چوہدری فواد حسین کا کہنا تھا کہ وقت گزرنے کے ساتھ غالب کی اہمیت کم نہیں ہوئی، غالب نے خط نگاری کو نیا اسلوب اور بے ساختہ آہنگ عطا کیا۔
چوہدری فواد حسین نے ہدایت کی کہ وزارت اطلاعات اور اس سے منسلک ادارے مشاعرے کے انعقاد سمیت مرزا غالب کی سالگرہ کے موقع پر خصوصی پروگرامز ترتیب دیں۔
اجلاس میں وفاقی سیکرٹری اطلاعات شفقت جلیل،ایڈیشنل سیکرٹری اطلاعات زاہدہ پروین، ڈائریکٹر جنرل پاکستان نیشنل کونسل آف آرٹس جمال شاہ، جوائنٹ سیکریٹری قومی تاریخ وادبی ورثہ ڈویژن سید جنید اخلاق، ادارہ فروغ قومی زبان کے سربراہ اور نامور شاعر افتخار عارف،مینجنگ ڈائریکٹر نیشنل بک فاونڈیشن ڈاکٹر انعام الحق جاوید،ڈائریکٹر جنرل اکادمی ادبیات پاکستان ڈاکٹر راشد حمید اور ایگزیکٹو ڈائریکٹر لوک ورثہ شہیرہ شاہد سمیت دیگر حکام نے شرکت کی۔
اے پی پی/ناہید/ شاہ زیب
وی این ایس اسلام آباد
