کراچی، 19 جنوری (اے پی پی) : ملائیشیا کے ڈپٹی منسٹر برائے پرائمری انڈسٹریز کی سربراہی میں نو رکنی وفد نے صدر پاکستان ڈاکٹر عارف علوی اور گورنر سندھ عمران اسماعیل سے آج سندھ گورنر ہاؤس میں ملاقات کی۔ ملاقات میں دونوں ممالک کے درمیان باہمی تعلق کو مزید فروغ دینے، تجارت اور سرمایہ کاری میں اضافہ کی اہمیت پر تبادلہ خیال کیا۔ صدر پاکستان ڈاکٹر عارف علوی نے کہا کہ موجودہ حکومت بیرونی سرمایہ کاری اور تجارت کے فروغ کے لئے ہر ممکن اقدامات کو یقینی بنارہی ہے اس ضمن میں درپیش مسائل اور رکاوٹوں کو دور کیا جارہا ہے۔ ڈاکٹر عارف علوی نے وفد کو اپنی جانب سے ہر ممکن تعاون کی یقین دہانی کراتے ہوئے ٹریڈ ڈیولپمنٹ اتھارٹی آف پاکستان کے سیکریٹری کو ہدایات دی کہ وہ پام آئل کی صنعت سے وابستہ سرمایہ کاروں کو درپیش مسائل فوری حل کریں تاکہ اس صنعت میں بیرونی سرمایہ کاری کو مزید فروغ دیا جاسکے۔
گورنر سندھ عمران اسماعیل نے وفاقی حکومت کی جانب سے عوامی بہبود کے منصوبوں ، کراچی انفرااسٹر کچر کی بحالی، ماس ٹرانزٹ کی بہتری، صاف پانی کی فراہمی سمیت دیگر منصوبوں کے بارے میں وفد کو تفصیلات سے آگاہ کیا۔ گورنر سندھ نے دونوں ممالک کے درمیان سیاحت کو مزید فروغ دینے کی ضرورت پر زور دیتے ہوئے ملائیشیا کے ٹوریسٹ گروپس کو پاکستان میں موجود سیاحتی مقامات کے دورے کی دعوت دیتے ہوئے کہا کہ پر امن اور خوبصورت پاکستان آپ کا منتظر ہے۔
ملائیشین ڈپٹی منسٹر برائے پرائمری انڈسٹری نے کہا کہ ان کے دورے کا مقصد پاکستان میں ملائیشین مصنوعات کی درآمدکو مزید بڑھانے اور مارکیٹس میں مصنوعات کی مانگ میں اضافے میں حائل رکاوٹوں کو حل کرنا شامل ہے۔ انہوں نے کہا کہ ملائیشین سرمایہ کار پاکستان میں پام آئل کی صنعت میں سرمایہ کاری کے خواہاں ہے۔
اے پی پی /وی این ایس کراچی/فاروق
سورس: وی این ایس کراچی
