اسلام آباد ، 8 جنوری (اے پی پی): صدر مملکت ڈاکٹر عارف علوی نے پاکستان اور جاپان کے درمیان اعلیٰ سطح پر تبادلوں کے فروغ پر اطمینان کا اظہار کرتے ہوئے اس امر پر زور دیا ہے کہ سیاسی، اقتصادی اور تجارتی شعبوں میں تعاون بڑھایا جائے-
عارف علوی نے کہا کہ تعاون بڑھانے سے تجارت و سرمایہ کاری، سیاحت اور عوامی سطح پر روابط میں اضافہ ہوگا ۔
انہوں نے یہ بات منگل کے روز پاکستان میں جاپان کے سفیر تاکاشی کورائی سے گفتگو کرتے ہوئے کہی جنہوں نے اپنی سفارتی مدت پوری ہونے پر ان سے الوداعی ملاقات کی۔
صدر نے دونوں ممالک کے درمیان باہمی تعلقات کے مزید استحکام میں سفیر کے فعال کردار کو سراہا۔
سبکدوش ہونے والے سفیر نے کہا کہ پاک جاپان تعلقات باہمی احترام اور معاونت سے عبارت ہیں۔ انہوں نے کہا کہ پاکستان میں اپنے قیام کے دوران انہیں پاکستانی ریاستی اداروں سے بھرپور حمایت اور معاونت حاصل رہی اور پاکستان میں ہر جگہ ان کا والہانہ خیرمقدم کیا گیا۔
اے پی پی / عمار برلاس /شاہ زیب
سورس : وی این ایس اسلام آباد
