اسلام آباد، 29جنوری (اے پی پی): وزیرِ اعظم عمران خان نے نیا پاکستان ہاؤسنگ پروگرام کے سلسلے میں اجلاس کی صدارت کرتے ہوۓ ہدایت کی ہے کہ کم آمدنی والے افراد کے لیے اپنے ذاتی گھروں کے حصول کے خواب کوممکن بنانے کے لیے ہر ممکنہ سہولت فراہم کی جائے۔
وزیراعظم نے کہا کہ پچاس لاکھ گھروں کی تعمیر کے پراجیکٹ سے نہ صرف کم آمدنی والے افراد کو گھر کی سہولت میسر آئے گی بلکہ معیشت کا پہیہ چلے گا اور نوجوانوں کو نوکریوں کے مواقع میسر آئیں گے۔ اجلاس میں وزیراعظم کے اعلان کردہ نیا پاکستان ہاؤسنگ پروگرام کے حوالے سے کم آمدنی والے افراد کو کمرشل بنکوں کی جانب سے فنانسنگ کے حصول سے متعلقہ امور پر تفصیلی غور کیا گیا ۔
وزارتِ خزانہ اور سٹیٹ بنک کی جانب سے ہاؤسنگ فنانسنگ کے ضمن میں بنکوں کو مراعات فراہم کرنے کا فیصلہ بھی کیا گیا۔اس اقدام کا مقصد کم آمدنی والے افراد کو بنکوں کی جانب سے آسان قرضوں کی سہولت فراہم کرنا ہے تاکہ وہ نیاپاکستان ہاؤسنگ پروگرام سے استفادہ کر سکیں۔ وزیر اعظم نے اجلاس کے دوران ہدایت کی کہ فورکلوژر اور ریئل اسٹیٹ ریگولیٹری اتھارٹی کے قوانین کو جلد ازجلد پایہ تکمیل تک پہنچایا جائے۔ اجلاس میں وزیرِ خزانہ اسد عمر، سینئر وزیر پنجاب علیم خان، معاون خصوصی نعیم الحق،معاون خصوصی افتخار درانی، ضیغم رضوی، یعقوب اظہار، گورنر سٹیٹ بنک طارق باجوہ، سیکرٹری ہاؤسنگ ڈاکٹرعمران زیب و دیگر نے شرکت کی۔
اے پی پی/ عمّار برلاس /شاہ زیب
وی این ایس اسلام آباد
