لندن،05فروری(اے پی پی ): وزیر خارجہ مخدوم شاہ محمود قریشی نے کہا ہے کہ پوری پاکستانی قوم آج مقبوضہ کشمیر کے کشمیریوں کے ساتھ اظہار یکجہتی کر رہی ہے جو بڑی ہمت، عزم، حوصلے اور تدّبر کے ساتھ بربریت کا مقابلہ کر رہی ہے۔
لندن سے یوم یکجہتی کشمیر کے حوالے سے اپنے خصوصی پیغام میں وزیر خارجہ مخدوم شاہ محمود قریشی نے اس خواہش کا اظہار کیا کہ مجھے بے حد خوشی ہوتی اگر حریت قیادت بھی آج آزاد ہوتی ، کاش انہیں اظہار کا موقع ملتا،کاش کشمیری عوام سنگینوں کے نیچے آزادی کے نعرے نہ لگا رہے ہوتے۔
وزیر خارجہ نے کہا کہ یہ حق ان کشمیریوں کو مل کر رہے گا کیونکہ یہ عزم، یہ ہمت اور یہ حوصلہ اگلی نسل کو منتقل ہو چکا ہے،یہ واضح ہو چکا ہے کہ یہ تحریک کامیاب ہو کر رہے گی آج پاکستان کا بچہ بچہ، پاکستان کا دانشور طبقہ اور ہر وہ شخص جس کے پاس قلم کی طاقت ہے وہ کشمیریوں کے ساتھ کھڑا ہے۔
انہوں نے مزید کہا کہ ہم کشمیری عوام کی قربانیوں کو سلام پیش کرتے ہیں ان ماؤں، بہنوں اور بچوں کی عظمت کو سلام پیش کرتے ہیں جو حق خودارادیت کیلئے اپنی جدوجہد جاری رکھے ہوئے ہیں۔
اے پی پی /احسن /حامد
وی این ایس ، اسلام آباد
