اسلام آباد 07 مارچ (اے پی پی): ایڈمرل ظفر محمودنے کہا ہے کہ بھارتی آبدوز کا بروقت سراغ لگانا پاک بحریہ کی آپریشنل تیاریوں اور پیشہ ورانہ صلاحیتوں کا منہ بولتا ثبوت ہے۔ ان کا کہنا تھا کہ ہم امن پسند ملک ہیں مگردشمن کی کسی بھی جارحیت کا منہ توڑ جواب دینے کی انتہائی صلاحیت رکھتے ہیں۔
آج پاک بحریہ کے اگلے مورچوں اور ساحلی تنصیبات کے دورے کے دوران پاک بحریہ کی آپریشنل تیاریوں کا جائزہ لیتے ہوئے امیرالبحر ایڈمرل ظفر نے کہا کہ ہم جارحیت نہیں چاہتے مگر اگر دشمن نے پہل کی تو بھر پور جواب دیں گے۔ ہمارا غیر متزلزل ایمان ، ہمت اور وطن کی حفاظت کا جذبہ ہماری صلاحیتوں کو استحکام عطا کرتا ہے۔
ترجمان پاک بحریہ کے بیان کے مطابق نیو ل چیف نے شمالی بحیرہ عرب میں تعینات بحری جہازوں کا دورہ بھی کیا جہاں انہیں پاک بحریہ کی آپریشنل تیاریوں پر بریفنگ دی گئی۔دورے کے دوران امیرالبحر نے افسروں اور جوانوں سے ملاقات کرتے ہوئے آپریشنل تیاریوں اور ان کے بلند حوصلے کو سراہا۔اس موقع پر انہوں نے پاک بحریہ کے افسروں اور جوانوں کو موجودہ صورت حال میں ہمہ وقت انتہائی مستعد اور چوکس رہنے کی ہدایت کی۔
وی این ایس، اسلام آباد
