اسلام آباد،13مارچ (اے پی پی ): وفاقی وزیر برائے اطلاعات و نشریات چوہدری فواد حسین نے کہا ہے کہ پاکستان نے کھیلوں کے میدان میں دنیا میں اپنا لوہا منوایا ہے اور عالمی اعزازات اور کرکٹ ورلڈ کپ اپنے نام کیا ہے، صحت مند معاشرے کی تشکیل کیلئے کھیلوں کا انعقادنہایت ضروری ہے۔
سپورٹس گالا کی افتتاحی تقریب سے خطاب کرتے ہوئے انہوں نےکہاکہ وقت کیساتھ ساتھ کھیلوں کے شعبوں میں تنزلی آئی ہےاورپاکستان کھیلوں کے حوالے سے ایک محفوظ ملک ہے، پاکستان نے کھیلوں میں ہمیشہ شاندار روایات قائم کیں ہیں۔
فواد حسین کاکہنا تھا کہ گزشتہ حکومتوں نے قوم کا پیسہ اپنے ذاتی مفاد کیلئے استعمال کیا۔ ہم ملک میں کھیلوں کی بہتری کیلئے موثر اقدامات کر رہے ہیں جبکہ تحصیل اور یونین کونسل کی سطح پر کھیلوں کے میدان بنائیں گے۔
خواتین کی کھیلوں میں شمولیت پر زور دیتے ہوئے ان کا کہنا تھا کہ خواتین نے کھیل کے شعبے میں بھی نمایاں کارکردگی دکھائی ہے۔ کھیلوں سے مثبت اور صحت مندانہ سرگرمیاں پیدا ہوتی ہیں۔ نئی نسل کیلئے سکرین کا استعمال کم اور کھیلوں کے مواقع بڑھانا ہونگے۔
وی این ایس ،اسلام آباد
