اسلام آباد، 15اپریل (اے پی پی): امام کعبہ شیخ عبداللہ عواد الجہنی کی پارلیمنٹ ہاؤس آمد پرسپیکر قومی اسمبلی اسد قیصر سے ملاقات ہوئی۔ ملاقات میں پاک۔ سعودی عرب تعلقات اورمسلم اُمہ کو درپیش مسائل پر تفصیلی گفتگو ہوئی۔
اسد قیصر نے گفتگو کرتے ہوئے کہا کہ سعودی عرب پاکستان کا بے لوث دوست ہے اور سعودی عرب ہر مشکل وقت میں پاکستان کے شانہ بشانہ کھڑا رہا ہے اور فراخدلانہ مد د کی ہے۔ دونوں ممالک مشترکہ عقیدہ،ثقافت،تاریخ اور ورثے کے امین ہیں۔ پاکستانی عوام سعودی عرب کے ساتھ گہری وابستگی رکھتے ہیں۔
سپیکرقومی اسمبلی نے کہا کہ پاک۔ سعودی دوستی حکومتوں تک محدود نہیں بلکہ یہ دوستی دونوں ممالک کے عوام کے دلوں میں رچی بسی ہوئی ہے۔ پاکستان کی پارلیمان دونوں ممالک کے مابین برادرانہ تعلقات کو مزید مستحکم بنانے کے لیے پرْ عزم ہے۔ مسلم اُمہ کو بے شمار مسائل درپیش ہیں جن سے نمٹنے کے لئے ہمیں آپس کے اختلافات کو پسِ پُشت ڈالنا ہوگا۔
انہوں نے کہا کہ مسلم ممالک کے مابین اتحاد اور قریبی رابطے وقت کی اہم ضرورت ہے۔ اسلام امن اور بھائی چارے کا درس دیتا ہے، دہشتگر دی اور انتہا پسندی کی اسلام میں کوئی گنجائش نہیں۔
انہوں نے کہا کہ سعودی ولی عہد محمد بن سلمان کے حالیہ دورہ ٗپاکستان سے دوطرفہ تعاون کو مزید فروغ حاصل ہوا ہے۔
امام کعبہ شیخ عبداللہ عواد الجہنی نے کہا کہ سعودی عرب پاکستان کے ساتھ اپنے تعلقات کو بڑی اہمیت دیتا ہے اور انہیں مزید وسعت دینا چاہتا ہے۔ مسلمانوں کو دہشتگردی اور دیگردرپیش مسائل کا سبب دین سے دوری اور آپس میں نااتفاقی ہے۔ اسوہٗ حسنہ اور اسلامی تعلیمات پر عمل کر کے ہم دنیا و آخرت میں کامیابی حاصل کر سکتے ہیں۔
امام کعبہ نے کہا کہ مسلم اُمہ کو درپیش چیلنجزکے حل کے لیے سعودی عرب ہمیشہ اپنا مثبت کردار ادا کرتا رہے گا۔ پاکستان اور سعودی عرب کا دکھ درداور منزل ایک ہے۔ پاک۔سعودی عرب تعلقات امن، ترقی اور خوشحالی کی علامت ہیں۔
امام کعبہ نے کہا کہ دہشتگردیاور انتہا پسندی کے خاتمے کے لیے مسلم ممالک کو مل کر کام کرنے کی ضرورت ہے۔
وی این ایس اسلام آباد
