اسلام آباد ۔ 8 اپریل (اے پی پی) وفاقی وزیر اطلاعات و نشریات چوہدری فواد حسین نے کہا ہے کہ پاکستان جاپان کیساتھ دوطرفہ تعلقات کو مزید مضبوط کرنے کا خواہاں ہے، دونوں ملکوں میں فلم، کلچر اور مشترکہ پروڈکشن کے شعبوں میں مزید کام کی ضرورت ہے
پیر کو جاپان کے پاکستان میں سفیر سے ملاقات میں گفتگو کرتے ہوئے وفاقی وزیر اطلاعات کا کہنا تھا کہ پاکستان کی طرف سے متعارف کرائی گئی نیو الیکٹرانک ویزا پالیسی میں جاپان شامل ہے، پاکستان سرمایہ کاری کے لئے پر کشش ملک ہے، دونوں ملکوں میں فلم، کلچر اور مشترکہ پروڈکشن کے شعبوں میں مزید کام کی ضرورت ہے۔ جاپان ٹیکنالوجی کے لحاظ سے پوری دنیا میں اپنا ایک مقام رکھتا ہے۔ انہوں نے کہا کہ پی ٹی وی اکیڈمی ریڈیو پاکستان اکیڈمی اور انفارمیشن اکیڈمی کو ملا کر میڈیا یونیورسٹی کا قیام عمل میں لایا جائے گا۔ میڈیا یونیورسٹی میں پرفارمنس آرٹس، ٹیکنیکل سکول اور ٹریننگ کے شعبے شامل ہوں گے۔ وزیراطلاعات نے کہا کہ میڈیا یونیورسٹی کے قیام اور ٹیکنیکل سسٹم کو لگانے کے لیے جاپان کے تعاون کے خواہاں ہیں۔ پی ٹی وی کو ڈیجیٹل کرنے کے حوالے سے پلان زیر غور ہے۔ جاپان کی ٹیکنالوجی سے استفادہ حاصل کیا جا سکتا ہے۔ اس موقع پر جاپان کے سفیر نے کہا کہ پاکستان کے شمالی علاقہ جات قدرتی خوبصورتی میں پوری دنیا میں مقام رکھتے ہیں۔ سیاحت کے فروغ کے لیے وزیراعظم عمران خان کے وژن کو سراہتے ہیں۔ انہوں نے کہا کہ پاکستان کے ساتھ تعلیم ،سپورٹس اور کلچرکے شعبوں میں تعاون کو بڑھانا چاہتے ہیں
وی این ایس
