اسلام آباد ، 28 اگست (اے پی پی): وزیراعظم عمران خان نے سرمایہ کاری بورڈ کو معیشت کے مختلف شعبوں میں کاروبار سے متعلق قوانین اور ریگولیٹری فریم ورک کو صحیح خطوط پر استوار کرنے اور آسان بنانے کے لئے متعلقہ فریقین کے ساتھ مشاورتی عمل جلد مکمل کرنے کی ہدایت کی ہے۔ انہوں نے یہ ہدایت بدھ کو وزیراعظم آفس میں ریگولیٹری رکاوٹوں کو دور کرنے کے بارے میں اجلاس کی صدارت کرتے ہوئے کی۔
وزیراعظم نے یہ بھی ہدایت کی کہ غیر ضروری ضابطوں کو کم کرنے کا عمل بھی جتنی جلدی ممکن ہو مکمل کیا جائے تاکہ کاروبار میں آسانی پیدا ہو اور کاروباری برادری بالخصوص کاروبار شروع کرنے والی کمپنیوں کو سہولت ملے۔
چیئرمین سرمایہ کاری بورڈ نے اجلاس کو بتایا کہ کاروبار میں آسانی کے لئے حائل رکاوٹوں کو دور کرنے کے حوالے سے فریقین کے ساتھ بھرپور مشاورت کا عمل جاری ہے۔ اس عمل میں غیر متعلقہ یا متروک ریگولیشن کا خاتمہ، موجودہ ریگولیٹری فریم ورک پر نظرثانی کرنا اور موجودہ قوانین میں ترامیم شامل ہیں۔
اجلاس کو یہ بھی بتایا گیا کہ ای کامرس کے ذریعے کاروباری لین دین میں شفافیت اور درستگی کو یقینی بنانے کے لئے ڈیجیٹل ”بزنس ریگولیٹری میپنگ پورٹل” بھی وضع کیا گیا ہے، خود کار طریقہ ہائے کار سے کاروباری برادری کو سہولت ملنے کے ساتھ ساتھ نظام میں شفافیت آئے گی۔
وزیر صنعت پنجاب نے وزیراعظم کو بتایا کہ پنجاب کی حکومت نے ٹیکسوں کو یکجا کرنے، معائنہ جات کے خاتمہ، ون ونڈو سہولت پیش کرنے اور پنجاب سمارٹ ریگولیشن ایکٹ متعارف کرانے سمیت کاروبار میں آسانی کے لئے کئی اقدامات اٹھائے ہیں۔
وزیراعظم نے ہدایت کی کہ ڈیجیٹل اکانومی کے فروغ اور کاروبار کے آغاز کے لئے ڈیجیٹل حل پیش کرنے پر خصوصی توجہ دی جانی چاہیے تاکہ انہیں آئی ٹی کے شعبے میں اپنی صلاحیتوں سے استفادہ کا موقع ملے۔ وزیراعظم نے کہا کہ سرمایہ کاروں کو سہولت اور کاروبار کرنے میں آسانی پیدا کرنا حکومت کی اولین ترجیح ہے۔ ریگولیٹری طریقہ کار کی آٹو میشن اور مطلوبہ معلومات کی آن لائن دستیابی سے کاروباری عمل کو خوش اسلوبی سے انجام دینے میں مدد ملے گی۔
وزیراعظم کو بتایا گیا کہ ان کی ہدایات کے مطابق پٹرولیم، ہائوسنگ و تعمیرات، پاور ڈویژن اور سرمایہ کاری بورڈ اپنے اپنے ڈویژنوں میں غیر ضروری ریگولیٹری رکاوٹوں کو دور کرنے کے حوالے سے منصوبہ جات جلد پیش کریں گے۔ وزیراعظم نے ہدایت کی کہ دیگر تمام ڈویژن بھی اسی طرح کے منصوبہ جات وضع کریں اور منظوری و عملدرآمد کے لئے پیش کریں۔
وی این ایس، اسلام آباد
