اسلام آباد،28اگست(اے پی پی ): وزیراعظم عمران خان نے ذخیرہ اندوزی اور منافع خوری کے خلاف بھرپور کارروائی،اوراس ضمن میں ٹیکنالوجی کے موثر استعمال کو بروئے کار لانے کی ہدایت کی ہے اورکہا ہے کہ عام آدمی کو ریلیف فراہم کرنے کے لئے ہر ممکن کوشش کی جائے اور ایسا مربوط نظام وضع کیا جائے جس کی بدولت غریب عوام پر کسی قسم کا اضافی بوجھ نہ آئے۔
ان خیالات کا اظہار وزیر اعظم نے شیڈول پرائس کنٹرول کے حوالے سے اقدامات پر وزیراعظم آفس میں اعلیٰ سطحی اجلاس کی صدارت کرتے ہوئے کیا۔
چیف سیکرٹری پنجاب نے اجلاس کے دوران اشیاء خورد ونوش کی قیمتوں کے تعین اور ذخیرہ اندوزی پر قابو پانے کے حوالے سے قانونی فریم ورک پر شرکاء کو تفصیلی بریفنگ دی اور کہا کہ اشیاء خورد ونوش کی قیمتوں میں غیر معمولی اضافے پر قابو پانے کے حوالے سے قائم شدہ ٹاسک فورس میں تاجروں اور مینو فیکچرز کے نمائندگان کو بھی شامل کیا گیا ہے۔اس کے علاوہ سات ضروری اشیاء خورد ونوش جن میں آٹا، گھی، ٹماٹر اور دالیں وغیرہ شامل ہیں کی قیمتوں کا مسلسل جائزہ لیا جارہا ہے۔
اجلاس کے شرکاء کو آگاہ کیا گیا کہ قیمتوں میں غیر معمولی اضافے پر قابو پانے کے لیے ایک ویب پورٹل کا اجراء بھی کیا گیا ہے جس کے تحت پرائس کنٹرول مجسٹریٹس کی کارکردگی کا مسلسل جائزہ لیا جارہا ہے۔ اس کے علاوہ اشیاء خورد ونوش کی قیمتوں کے تعین میں پیدا واری لاگت اور موسمیاتی اثرات کے جائزے کے حوالے سے اصولی ضابطہ کار بھی وضع کیا جارہا ہے۔
اجلاس کو روٹی کی قیمت کو برقرار رکھنے کے حوالے سے نان بائی ایسوسی ایشن کے چند تحفظات سے بھی آگاہ کیا گیا۔
چیف سیکرٹری خیبر پختونخوا نے صوبہ خیبر پختونخوا میں ذخیرہ اندوزوں اور منافع خوروں کے خلاف کریک ڈاؤن پر اجلاس کو بریف کیا۔
وزیرِ اعظم کو بتایا گیا کہ قیمتوں پر کنٹرول اور عوام الناس کی سہولت کی غرض سے صوبہ پنجاب میں سستے بازاربھی باقاعدگی سے لگائے جا رہے ہیں جبکہ وفاقی دارالحکومت میں ہفتے میں تین روز کے لئے سستے بازار لگائے جاتے ہیں۔
وزیراعظم عمران خان نے اجلاس سے خطاب کرتے ہوئے کہاکہ ہول سیل منڈیوں میں روزانہ کی بنیاد پر ضروری اشیاء خورد ونوش کی قیمتوں کی کڑی نگرانی کے حوالے سے ایک موثر نظام پر عمل درآمد کو یقینی بنا یا جائےاور ذمہ داران اور انتظامیہ کی جانب سے قیمتوں کے حوالے سے عوام الناس کو مسلسل باخبر رکھا جائے۔
وزیراعظم نے منڈیوں میں نیلامی کے عمل کو شفاف بنانے کے حوالے سے ایک مربوط حکمت عملی اپنانے کی ضرورت پر زورد یا تاکہ کاشت کاروں کا استحصال نہ ہوسکے اور اُن کو محنت کا جائزہ منافع مل سکے۔وزیر اعظم نے کہاکہ مارکیٹ کمیٹیز کی تشکیل اور انکی کارکردگی کو موثر بنانے کے حوالے سے اقدامات کی بھی ضرورت ہے تاکہ ذخیرہ اندوزوں اور منافع خوروں کے خلاف فوری کارروائی ہوسکے۔
وزیرِ ا عظم نے کہا کہ غریب آدمی کو روٹی کی دستیابی یقینی بنانا ریاست کی بنیادی ذ مہ داری ہے اور اس ضمن میں ریاست کی جانب سے کوئی کسر روا نہیں رکھی جائے گی۔انہوں نے کہاکہ “احساس پروگرام”کے تحت مستحقین کو راشن کی فراہمی کی تجویز بھی زیر غور ہے، حکومت عام آدمی کو ریلیف فراہم کرنے کے لیے پرعزم ہے اور اس ضمن میں ہر ممکن اقدامات اٹھائے جائیں گے۔
اجلاس میں وزیراعلیٰ پنجاب سر دار عثمان بزدار، وزیراعلیٰ خیبر پختونخوا محمود خان، معاون خصوصی برائے اطلاعات ڈاکٹر فردوس عاشق اعوان ، سیکرٹری داخلہ، چیف سیکرٹری پنجاب، چیف سیکرٹری خیبر پختونخوا، چیف کمشنر اسلام آباد اور دیگر سینیئر افسران شریک تھے۔
سورس: وی این ایس، اسلام آباد
