اسلام آباد، 29اگست(اے پی پی ):وزیر اعظم کی معاون خصوصی برائے اطلاعات ونشریا ت ڈاکٹر فردو س عاشق اعوان نے کہا ہے کہ وزیر اعظم ملک میں سرمایہ کاری کے فروغ کیلئے کوشاں ہیں،سرمایہ کاروں کیلئے کاروبار کرنا آسان بنایا جا رہا ہے،وزیراعظم کی ہدایت پر سرمایہ کاروں کیلئے باقاعدہ روڈ میپ بنایا جا رہا ہے۔
وفاقی وزیر توانائی عمر ایوب خان اور معاون خصوصی برائے پیٹرلیم ڈویژن ندیم بابر کے ہمراہ پریس کانفرنس سے خطاب میں معاون خصوصی برائے اطلاعات ونشریا ت ڈاکٹر فردو س عاشق اعوان نے کہا کہ وزیر اعظم کی ہدایت پر ملک میں سرمایہ کاروں اور بزنس مینوں کو آسانیاں فراہم کرنے کیلئے اقدامات کی جا رہی ہیں ۔
وفاقی وزیر توانائی عمر ایوب خان نے کہا کہ سرمایہ کاری اور کاروبارآسان بنانے کیلئے موثر اقدامات کیے جار ہے ہیں،ملک سے سرخ فیتے کا نظام ختم کر کے کاروبار کو آسان بنایا جا رہا ہے،اقداما ت کا آغاز وزارت پٹرولیم سے کیا گیا ہے۔انہوں نے کہا کہ ہمارا مقصد ملک میں سرمایہ کاری کے فروغ میں آسانیاں پیدا کرنا ہے،جب تک ملک میں کاروبار نہیں بڑھے گا ملازمتیں نہیں بڑھ سکتیں۔
معاون خصوصی برائے پیٹرلیم ندیم بابر نے کہا کہ وزارت پٹرولیم میں ان دونوں چیزوں پر کافی عرصے سے کام کر رہے تھے، کاروبار آسان بنانے کیلئے اصلاحات کی پالیسی منظور کرائی جائیگی، بہت سے قوانین ایسے ہیں جن کا کوئی مصرف نہیں ہے۔انہوں نے کہا کہ کئی شعبوں میں صحیح معنوں میں مقابلے کی فضاء موجود نہیں ،مقابلے کی فضاء پیدا کر کے سرمایہ کاری میں اضافہ کیا جا سکتا ہے۔
ندیم بابر نے کہا کہ پٹرولیم شعبے میں سرمایہ کاری کیلئے 30کے قریب منظوریاں درکار ہیں،نظام میں پیچیدگیوں کی وجہ سے 10سال میں بیرونی کمپنیاں پاکستان سے جا چکی ہیں۔پٹرولیم میں سرمایہ کاری کیلئے نظام سے غیر ضروری 10منظوریاں ختم کر دی ہیں۔
انہوں نے کہا کہ پٹرولیم کی دریافت اور پیداوار کیلئے 27نئے بلاک متعارف کرا رہے ہیں،نئے پٹرول پمپ کے قیام کیلئے تقریباً25منظوریاں درکار ہوتی ہیں،پٹرول پمپ لگانے کیلئے منظوریوں کی تعداد کم کر کے 6،7تک لا رہے ہیں۔معاون خصوصی نے کہا کہ عوام کی آسانی کیلئے بلوں کی ادائیگی کے دن بڑھا رہے ہیں،یوٹیلٹی بل کے اجراء کی تاریخ سے 15دن میں بل جمع کرانا ہو گا۔
ندیم بابر نے کہا کہ ستمبر سے گیس کے استعمال کے حوالے سے عوامی آگاہی مہم چلائی جائیگی،گیس کمپنیوں کی شکایت کے ازالے کیلئے موبائل ایپ متعارف کرا رہے ہیں،گزشتہ 6،7سال میں گیس دریافت کیلئے نئے بلاکس نہیں بنائے گئے۔
انہوں نے مزید کہا کہ نئی ایل این جی پالیسی تیار کر لی گئی ہے جس کا جلد اعلان کیا جائے گا، بیرونی کمپنیاں ایل این جی ٹرمینل لگانےمیں گہری دلچسپی لے رہی ہیں،5بیرونی کمپنیوں کو ایل این جی ٹرمینل لگانے کی اجازت دی گئی ہے،جہاں سے گیس دریافت ہو گی اس علاقے کو ترجیحی بنیادوں پر گیس دینگے۔گیس کے اضافی بلوں کا معاملہ جلد حل کر لیا جائے گا۔
وی این ایس، اسلام آباد
