لاہور ، 30 نومبر (اے پی پی): وزیر اعظم عمران خان نے کہاہے کہ پاکستان اس وقت نازک دور سے گزر رہا ہے جس کے لیے معاشی استحکام ضروری ہے، افسران کوہر قسم کے سیاسی دباؤسے آزاد کیا ہے، ہم نے نئے پاکستان میں پرانے مائنڈ سیٹ کو تبدیل کرنا ہے، پرانا نظام اب نہی چل سکتا، عوام کی خدمت کرنا بیوروکریسی کا اولین فرض ہے۔
یہ بات انہوں نے ہفتے کویہاں صوبائی بیوروکریسی اور پولیس کے سینئرافسران کےاجلاس کی صدارت کرتے ہوئے کہی۔اجلاس میں وزیر اعلیٰ پنجاب سردار عثمان بزدار، چیف سیکرٹری اور آئی جی پولیس بھی موجود تھے۔وزیر اعظم کے معاونین خصوصی ڈاکٹر فردوس عاشق اعوان، سید ذوالفقار بخاری اور بیرسٹر شہزاد اکبر نے بھی اجلاس میں شرکت کی۔
وزیر اعظم نے نئی تعیناتیوں پر افسران کو مبارکباد دی اور کہاکہ ساٹھ کی دہائی میں پاکستان کی گورننس، بیوروکریسی اور پالیسیز کی مثالیں دی جاتی تھیں۔وزیراعظم نے ملک کی معاشی استحکام کیلئے حکومت کی پالیسیوں اور اقدامات کا ذکرکرتے ہوئے کہاکہ ان اقدامات سے معیشت مستحکم ہو رہی ہے جس پروہ اپنی معاشی ٹیم کو مبارکباد دیتے ہیں ۔ انہوں نے کہاکہ بیوروکریسی اور دیگر عہدوں پر تعیناتیاں میرٹ پر کی گئی ہیں، ہم نے اپنے دور حکومت میں افسران کو ہر قسم کے سیاسی دباؤسے آزاد کیا ہے ،افسران کوسب کام میرٹ پر کرنے ہیں اور کسی سیاسی شخصیت کا کوئی بھی ناجائز کام ہر گز نہیں کرنا،معاشی ترقی کے لیے ایک قابل بیوروکریسی کا بہت اہم کردار ہے۔
وزیراعظم نے کہاکہ پنجاب میں امن وامان اور گورننس کے نظام میں بہتری لانے کی ضرورت ہے،افسران کوغریب آدمی کی زندگی میں بہتری لانے کے لیے کوششوں میں تیزی لانا ہے، اسی طرح بچوں کے خلاف جرائم کی روک تھام پر خصوص توجہ دیں،افسران کا کام کمزور کو طاقتور کے خلاف تحفظ فراہم کرنا ہے۔ وزیراعظم نے کہاکہ افسران کے پاس قانونی اتھارٹی ہے مگر یہ طاقت صرف اور صرف عوام کی خدمت اور ان کی زندگیوں میں بہتری لانے کے لیے استعمال کی جائے، عوام کی خدمت آپ پر فرض ہے۔ وزیراعظم نے کہاکہ پہلے تھانوں میں طاقتور کو تحفظ فراہم کیا جاتا تھا لیکن اب آپ کی ذمہ داری ہے کہ غریب کو طاقتور کے خلاف تحفظ فراہم کریں۔
سورس:وی این ایس، اسلام آباد
