اسلام آباد، 23 نومبر(اے پی پی ):پاک بحریہ کے دو جہازوں ، معاون اور اصلت نے موریتانیہ کی بندر گاہ نواکشوط کا دورہ کیا ، بندرگاہ پہنچانے پر پاکستانی جہازوں کا پُرتپاک استقبال کیا گیا۔اس دوران مشن کمانڈر نے میزبان بحریہ اور سول حکام سے اہم ملاقاتیں کیں ۔دورہ کے دوران پاک بحریہ کی جانب سے میڈیکل کیمپ کا انعقاد بھی کیا گیا ، موریتانی عوام نے میڈیکل کیمپ کے انعقاد پر پاکستان کو خراجِ تحسین پیش کیا ۔
ترجمان پاک بحریہ کے مطابق مشن کمانڈر نے میزبان بحریہ اور سول حکام سے ملاقاتوں میں باہمی دلچسپی کے امور اور بحری تعاون پر تبادلہ خیال کیا اور پاک بحریہ کے سمندری تحفظ کے اقدامات کو اجاگر کیا۔مشن کمانڈر نے امیرالبحر کی جانب سے موریتانی عوام اور بحریہ کے لیے خیر سگالی کا پیغام بھی پہنچایا۔
ترجمان پاک بحریہ کے مطابق پاک بحریہ نے جذبہ خیر سگالی کے تحت موریتانیہ میں میڈیکل کیمپ کا انعقاد کیا جس میں 2000 سے زائد افراد کو علاج، آپریشنز اور ادویات کی سہولتیں فراہم کی گئیں۔ موریتانین عوام نے پاک بحریہ کے میڈیکل کیمپ کے انعقاد کو بڑے پیمانے پر سراہا اور پاکستان کو خراجِ تحسین پیش کیا۔
اس موقع پر پاک بحریہ کے جہاز معاون پر عشایئے کا خصوصی اہتمام کیا گیا۔ عشائیہ میں موریتانین بحریہ کے اعلی حکام، سفارتی اور مقامی شخصیات نے بڑی تعداد میں شرکت کی۔
ترجمان پاک بحریہ کے مطابق دورے کا مقصد پاکستان کے مثبت امیج کا فروغ، دوطرفہ بحری تعاون کا مزید استحکام اور انسانی ہمدردی کے جزبے کو فروغ دینا ہے۔
سورس: وی این ایس، اسلام آباد
