14 ویں سکیورٹی وارفئیر اینڈ ایڈوانسڈ کمبیٹ ٹیکٹکس کورس کے شرکاء کو بیجز عطا کرنے کی تقریب

0
27

اسلام آباد ،  08  نومبر (اے پی پی ):  پی اے ایف بیس کلر کہا ر میں 14 ویں سکیورٹی وارفئیر اینڈ ایڈوانسڈ کمبیٹ ٹیکٹکس کورس کے شرکاء کو بیجز عطا کرنے کی تقریب منعقد ہوئی۔ائیر مارشل عاصم ظہیر، وائس چیف آف دی ائیر اسٹاف نے  کورس کے شرکاء کو بیجز اور اعلیٰ کارکردگی کا مظاہر ہ کرنے والوں میں ٹرافیاں تقسیم کیں۔

فلائیٹ لیفٹیننٹ عنصرکو کورس میں مجموعی طور پر  بہترین کارکردگی کی ٹرافی سے نوازا گیا  جبکہ فلائیٹ لیفٹیننٹ سحرش کو لیڈی آفیسرز میں بہترین کارکردگی کی ٹرافی عطا کی گئی۔ کارپورل ٹیکنیشن شاہد نے بہترین نشانہ باز کی ٹرافی حاصل کی۔

کورس کے شرکاء نے مسلح لڑائی  کے مظاہرے کے دوران اپنی بہترین نشانہ بازی  کے جوہر دکھائے اور اپنے اہداف کو ٹھیک ٹھیک نشانہ بنایا۔ شرکاء نے رسی کی مدد سے اترتے ہوئے فائرنگ کا مظاہرہ بھی کیا۔بعد ازاں دہشت گردوں کے فرضی ٹھکانوں پر حملہ کیا گیا جن میں شرکاء نے مسلح اور غیر مسلح لڑائی کی صلاحیتوں کا مظاہرہ کیا۔

اس کورس میں 321افراد نے ٹریننگ حاصل کی جن میں 23 افسران بھی شامل تھے۔اس کورس کی خاص بات چار لیڈی آفیسرز کی شمولیت تھی جنہوں نے بڑی بہادری کے ساتھ اس کٹھن کورس کو کامیابی سے مکمل کیا۔

سورس: وی  این ایس، اسلام آباد