اسلام آباد ، 27 دسمبر (اے پی پی ): وزیر خارجہ مخدوم شاہ محمود قریشی نے کہا ہے کہ آج مقبوضہ جموں و کشمیر میں کرفیو کے نفاذ کو 144 دن گزر چکے ہیں ، بھارت نے ذرائع مواصلات پر پابندی عائد کر کے دنیا کو مقبوضہ جموں و کشمیر کے اصل حقائق تک رسائی سے محروم رکھا ہوا ہے۔ آج مودی سرکار کی مسلم کش،اور ہندوتوا سوچ نے پورے ہندوستان کو تقسیم کر دیا ہے۔
ان خیالات کا اظہار وزیر خارجہ نے جمعہ کو وزارت خارجہ میں سابقہ سیکریٹریز کے مشاورتی اجلاس کی صدارت کرتے ہوئے کیا ، اجلاس میں مقبوضہ جموں کشمیر میں جاری بھارتی جارحیت اور خطے میں امن و امان کی تشویشناک صورتحال پر تبادلہ ء خیال کیا گیا ۔ انہوں نے کہا سیکولر ہندوستان کے حامی گلی گلی ،نگر نگر ترمیمی شہریت کے امتیازی قانون اور این آر سی کے خلاف سراپا احتجاج ہیں۔ 5 اگست کو جو آگ مودی حکومت نے مقبوضہ جموں و کشمیر میں لگائی تھی وہ اب پورے ہندوستان میں پھیل چکی ہے۔ ہندوستان، اپنے داخلی انتشار سے توجہ ہٹانے کے لیے مسلسل لائن آف کنٹرول کی خلاف ورزیاں کر رہا ہے جبکہ ہماری مسلح افواج اور پاکستانی قوم کا بچہ بچہ وطن کی حفاظت کیلئے پر عزم ہے۔
مخدوم شاہ محمود قریشی نے سابقہ خارجہ سیکریٹریز کو مقبوضہ جموں و کشمیر کی صورتحال کے حوالے سے صدر سیکورٹی کونسل کو لکھے گئے اپنے حالیہ خط کے مندرجات سے آگاہ کیا۔دوران اجلاس اہم خارجہ پالیسی امور پر،اس مشاورتی سلسلے کو تواتر کے ساتھ جاری رکھنے پر اتفاق کیا گیا۔
اے پی پی /حمزہ /قرۃالعین
