اسلام آباد 11 دسمبر (اے پی پی ): وزیر اعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ پاکستان میں آزادی صحافت پر پابندیوں کے حوالے سے منفی پروپیگنڈہ کیا جا رہا ہے۔ پاکستان میں ہر شہری کو آزادی رائے کا مکمل حق حاصل ہے،میڈیا مالکان اور ورکرز کے درمیان خلیج کو کم کرنے کیلئے اقدامات کر رہے ہیں۔
جمعہ کو پارلیمنٹ ہاؤس کے باہر میڈیا سے گفتگو کرتے ہوئے ڈاکٹر فردوس عاشق اعوان کا کہنا تھا کہ چند عناصر صحافتی آزادی کی آڑ میں اپنے مفادات کا تحفظ چاہتے ہیں۔ وزیراعظم نے صحافتی شعبے کو درپیش مستقبل کے چیلنجز کو حل کرنے کیلئے کمیٹی تشکیل دی ہے۔ وزیراعظم کی تشکیل کردہ کمیٹی میں صحافتی نمائندوں کی تنظیموں کے اراکین شامل ہونگےاور کمیٹی میں فوکل پرسن کا کردار ادا کروں گی۔
انہو ں نے کہا کہ ایوان میں ایک ساتھی نے انفارمیشن کمیشن سے متعلق غلط بیانی کی،انفارمیشن کمیشن کو متعدد درخواستیں موصول ہوئی ہیں، ایوان میں غلط بیانی پارلیمنٹ کے تقدس کو پامال کرتی ہے۔
معاون خصوصی برائے اطلاعات نے کہا کہ پاکستان میں بیرونی سرمایہ کاری کیلئے سازگار ماحول فراہم کیا جا رہا ہے۔عالمی ادارے پاکستان کی معیشت کے استحکام کی نوید سنا رہے ہیں۔ ماضی کی حکومتوں نے ملک کی معیشت کو شدید نقصان پہنچایا ہے۔ انہوں نے کہا کہ حکومت کو معیشت سمیت کئی شعبوں میں چیلنجز کا سامنا رہا جبکہ پاکستان کی معیشت اب بہتری کی طرف جا رہی ہے۔ بین الاقوامی ایجنڈے کے تحت کچھ لوگ ملکی معیشت سے متعلق غلط بیانی کر رہے ہیں۔
ڈاکٹر فردوس عاشق اعوان کا کہناتھاکہ طاقتور قانون سے پاکستان کو طاقتور بنائیں گے۔ سٹوڈنٹ یونینز سیاستدانوں کی نرسری کا کردار ادا کرتی ہیں اور سٹوڈنٹ یونینز میں سے جرائم پیشہ عناصر کو نکالنے کیلئے اقدامات کرنے ہونگے۔ انہوں نے اسلامی یونیورسٹی میں ہونیوالا واقعہ کو افسوسناک قرار دیا۔
وی این ایس اسلام آباد
