اسلام آباد: 2 جنوری (اے پی پی ): : وفاقی وزیر منصوبہ بندی ، ترقی اور خصوصی اقدامات اسد عمر کی زیرصدارت پبلک پرائیویٹ پارٹنرشپ اتھارٹی (پی پی پی اے) کے بورڈ آف ڈائریکٹرز کا اجلاس آج منعقد ہوا جس میں سکھر حیدرآباد موٹر وے اور نسٹ ٹیچنگ اینڈ ریسرچ ہسپتال کے پبلک پرائیویٹ پارٹنرشپ پروجیکٹس کے مالی ڈھانچے پر غور کیا گیا۔
اس موقع پر سکریٹری مواصلات اور چیئرمین این ایچ اے نے بورڈ کو سکھر حیدرآباد موٹر وے پروجیکٹ کے مختلف پہلوؤں سے آگاہ کیا۔ ان کا کہنا تھا کہ ایم 6 این ایچ اے کا منصوبہ ہے ، جس کی تعمیر بی او ٹی کے ذریعے تجویز کی گی۔ موٹر وے پروجیکٹ پر 204.28 ارب روپے لاگت آنے کا تخمینہ ہے ، اور اسے مکمل ہونے میں 33 ماہ لگیں گے۔ این ایچ اے ٹیم نے اس منصوبے کے مجوزہ مالی ڈھانچے کے بارے میں تفصیلی بریفنگ دی جو پی پی پی اتھارٹی کے مشورے سے تیار کی گئی تھی۔ تفصیلی گفتگو کے بعد ، بورڈ نے فزیبلٹی میں تجویز کردہ آپشن کی بنیاد پر پروجیکٹ کے مالی ڈھانچے کی منظوری دے دی۔
بورڈ نے پی پی پی موڈ میں بی او ٹی کی بنیاد پر ٹیچنگ اینڈ ریسرچ ہسپتال (این ٹی آر ایچ) کی تعمیر کے لئے نسٹ کی تجویز پر بھی غور کیا اور مکمل غور و فکر کے بعد اس منصوبے کو بی او ٹی کی بنیاد پر منظوری دے دی۔
یہ بھی فیصلہ کیا گیا کہ ہسپتال میں عوامی فلاح و بہبود کا عنصر موجود ہوگا اور وہ صحت انصاف کارڈ ہولڈرز کے علاج معالجے کی ضروریات کو بھی پورا کرے گا۔
وی این ایس
