لاہور،18جنوری(اے پی پی): وزیر اعلی پنجاب سردار عثمان بزدار سے وزیر اعظم کی معاون خصوصی برائے اطلاعات ونشریات ڈاکٹر فردوس عاشق اعوان نے ملاقات کی اور باہمی دلچسپی کے امور، سیاسی صورتحال اور ملکی امور پر تبادلہ خیال کیا۔وزیر اعلی پنجاب نے کہا کہ تنقید برائے تنقید کرنے والے ملک و قوم کے خیر خواہ نہیں،ایسے عناصر محض ذاتی مفادات کے ایجنڈے کو لیکر چل رہے ہیں۔ہمارا مقصد عوام کو ریلیف دینا اوران کیلئے آسانیاں پیدا کرنا ہے۔
وزیر اعلی پنجاب نے کہا کہ پنجاب میں آٹے کی قیمتوں میں استحکام کیلئے ہرضروری اقدام اٹھایا ہے۔گندم کا سرکاری کوٹہ اوپن مارکیٹ میں فروخت کرنے والی فلور ملوں کے خلاف بلاامتیاز کارروائی جاری ہے،آٹے کی قیمت میں اضافہ کسی صورت قابل قبو ل نہیں۔عوام کے حقوق کا نگہبان ہوں،کسی کو عوام کے مفادات پر ڈاکہ نہیں ڈالنے دوں گا۔
انہوں نے کہا کہ پنجاب حکومت کے موثر اقدامات سے صوبہ بھر میں آٹامقرر کردہ قیمت پر وافر دستیاب ہے۔فرائض سے غفلت برتنے پر محکمہ خوراک کے افسران کے خلاف کارروائی شروع کردی گئی ہے۔آٹے کی قیمتوں میں استحکام کے لئے ضروری انتظامی اقدامات تسلسل کے ساتھ جاری رہیں گے۔
وزیر اعلی نے کہا کہ چکی مالکان کوبھی آٹے کی قیمت میں اضافے کی اجازت نہیں دیں گے۔آٹے کی قیمت میں بلاجواز اضافہ کرنیوالوں کیخلاف قانون اپنا راستہ خود لے رہا ہے۔انھوں نے کہا کہ پنجاب میں اتحادی جماعت کو ساتھ لے کر چل رہے ہیں۔
ڈاکٹرفردوس عاشق اعوان نے اپنی گفتگو میں کہا کہ وزیراعلیٰ عثمان بزدار کی قیادت میں پنجاب حکومت نے آٹے کی مقرر قیمت پر دستیابی یقینی بنانے کیلئے بروقت اقدامات کیے ہیں-ڈاکٹر فردوس عاشق اعوان نے موثر اقدامات پر پنجاب حکومت کو خراج تحسین پیش کیا،انھوں نے کہا کہ وزیراعلیٰ پنجاب صوبے کو بہترین انداز سے چلا رہے ہیں،پاکستان تحریک انصاف کی ٹیم وزیر اعظم عمران خان کی قیادت میں متحد ہے۔
انھوں نے کہا کہ وزیراعلیٰ سردار عثمان بزدار نے صوبے کے عوام کی خدمت کیلئے شاندار اقدامات کئے ہیں، وزیراعلیٰ عثمان بزار کی قیادت میں پنجاب حکومت نے مختصر عرصے میں ریکارڈ قانون سازی کر کے بے مثال کام کیا ہے۔ ڈاکٹر فردوس عاشق اعوان نے کہا کہ اپوزیشن کا بیانیہ بری طرح بے نقاب ہوچکا ہے۔سیاسی یتیم پاکستان کی سیاست سے آؤٹ ہوچکے ہیں، وزیراعظم عمران خان کی قیادت میں نئے پاکستان میں صرف دیانتداری اورایمانداری کی سیاست ہوگی۔
سورس: وی این ایس، لاہور
