سکھر،18فروری ( اے پی پی ): پاکستان پیپلز پارٹی کے رہنما سید خورشید احمد شاہ اور ان کے دوبیٹوں ایم پی اے فرخ شاہ، زیرک شاہ، داماد صوبائی وزیر سید اویس شاہ اوران کی دو بیگمات سمیت 18 افراد کے خلاف ایک ارب 23 کروڑ روپے سے زائد اثاثے بنانے کے الزام میں دائر نیب ریفرنس کی سماعت سکھر کی احتساب عدالت میں ہوئی ۔
سماعت کے موقع پر پیپلز پارٹی کے مرکزی رہنما سید خورشید احمد شاہ کو جو کہ سکھر کی این آئی سی وی ڈی اسپتال میں زیر علاج ہیں کو ایمبولینس کے ذریعےاسپتال سے عدالت لایا گیا جہاں پر موجود کارکنوں کی بڑی تعداد نے ان کا استقبال کیا ۔
سماعت کے موقع پر خورشید شاہ کے صاحبزادے ایم پی اے فرخ شاہ، داماد صوبائی وزیر اویس شاہ اور خورشید شاہ کی ایک بیگم بھی عدالت میں پیش ہوئیں ،عدالت نے سماعت کے دوران خورشید شاہ اور دیگر ملزمان کے وکلاءاور نیب پراسیکیوٹر کے مختصر دلائل کے بعد ریفرنس کی سماعت 9 مارچ تک ملتوی کردی گئی ۔ آج کی سماعت پر بھی ریفرنس کے ملزم جنید قادر شاہ جن کے گذشتہ سماعت پر عدالت نے وارنٹ گرفتاری جاری کیے تھے پیش نہیں ہوئے اور ان کے وکیل کا موقف تھا کہ ان کے موکل ملک سے باہر ہیں اور وطن واپس آتے ہی عدالت میں پیش ہونگے۔
وی این ایس،سکھر
