پشاور، 11مارچ(اے پی پی ): چیف کیپٹل پولیس آفیسر پشاور محمد علی گنڈا پور نے کہا ہے کہ پشاور میں چینی ثقافتی مرکز کا قیام خوش آئند ہے اور یقینا” مستقبل میں اہل پشاور پاک چین دوستی میں اپنا مثبت اور تعمیری کردار ادا کریں گے۔
ان خیالات کا اظہار انہوں نے پشاور میں قائم چائنہ ونڈو کے دورے کے موقع پر کیا جہاں انہوں نے ونڈو میں قائم مختلف گیلریاں دیکھیں اور اان میں گہری دلچسپی کا اظہار کرتے ہوئے مہمانوں کی کتاب میں اپنے تاثرات بھی درج کئے۔
محمد علی گنڈا پور نے میڈیا سے گفتگومیں کہا کہ پشاور میں تفریحی مراکز کی کمی اب چائنہ ونڈو پورا کرے گی ۔رشکئی اکنامک زون کے قیام کے بعد پشاور ثقافتی اور تفریحی سرگرمیوں کا مرکز ہو گا اور پشاور پولیس سی پیک منصوبوں میں کام کرنیوالوں کو پشاور میں ہر ممکن سیکورٹی فراہم کرے گی۔
ایک سوال کے جواب میں ان کا کہنا تھا کہ پاکستان اور چین کی دوستی لازوال ہے اور دونوں ملکوں نے ہمیشہ ایک دوسرے کا ساتھ دیا ہے اور وہ سمجھتے ہیں کہ سی پیک نہ صرف سارے ملک بلکہ خیبر پختونخوا کی معاشی و اقتصادی ترقی میں قابل ذکر کردار ادا کرے گا۔
ایک سوال کے جواب میں محمد علی گنڈا پور کا کہنا تھا کہ پشاور میں جرائم کی روک تھام کیلئے تمام وسائل بروئے کار لائے جا رہے ہیں اور جرائم پیشہ عناصر کا قلع قمع کرنے کیلئے ہر ممکن اقدامات کئے جائیں گے۔
اےپی پی/صائمہ حیات/فاروق
