پشاور، 18اپریل(اے پی پی): صوبائی مشیر اطلاعات و تعلقات عامہ اجمل خان وزیر نے کہا ہے کہ حکومت نے کورونا سے نمٹنے کے لئے اقدامات تیز کردیے ہیں جبکہ وزیراعلیٰ محمود خان خود مختلف اضلاع کے دورے کرکے انتظامات کا جائزہ لے کر مزید ہدایات جاری کر رہے ہیں۔
سول سیکرٹریٹ پشاور میں میڈیا سے گفتگو کرتے ہوئے صوبائی وزیر کا کہنا تھا کہ افغانستان میں پھنسے پاکستانیوں کو واپس لانے کے لیے انتظامات مکمل کر لیے گئے ہیں جن کو ہفتہ میں دودن مرحلہ وار پاکستان لایا جائے گا جس کے لیے ہفتہ اور منگل کے دن طورخم بارڈر کھلا رکھا جائے گا ۔دونوں دن پانچ سو ،پانچ سو پاکستانیوں کو واپس لایا جائے گا۔ آج پانچ سو پاکستانیوں کو واپس لاکر ضلع خیبر میں قرنطین کیا گیا جس کے لیے قرنطینہ سنٹرز میں تمام سہولیات فراہم کر دی گئی ہے۔
مشیر اطلاعات نے کہا کہ پاکستانی قونصلیٹ جلال آباد نے افغان سائیڈ پر واپس آنے والے پاکستانیوں کی سہولیت کے لئے آفس قائم کردیا ہے ۔ آج 345 افغان تبلیغی حضرات کو بھی واپس افغانستان بھیج دیا گیا، ان تمام افغان تبلیغی حضرات نے قرینطین مدت پوری کی اور سب کے ٹیسٹس بھی کیے گئے۔
اجمل وزیر نے کہا کہ افغانستان سے 195 ٹرک ڈرائیوروں کو بھی ٹرکوں سمیت واپس لانے کے لئے جمعہ کے روز بھی طورخم بارڈر کھلا رکھا گیا تھا ،یہ ٹرک ڈرائیور افغانستان میں 16 مارچ سے پھنسے ہوئے تھے۔
مشیر اطلاعات نے بتایا کہ خیبرمیڈیکل یونیورسٹی میں کورونا ٹیسٹنگ کی استعداد کار کو 40 سے بڑھا کر 700 کردیا گیا ہے اور حیات آباد میڈیکل کمپلکس اور سیدو ٹیچنگ ہسپتال میں کورونا کی ٹیسٹنگ شروع کردی ہے جبکہ ایبٹ آباد اور ڈیرہ اسماعیل خان میں بھی جلد کورونا کے ٹیسٹ شروع کردیے جائیں گے ،اسکے علاوہ نجی ہسپتالوں میں بھی کورونا وائرس کی تشخیص کے لئے ٹیسٹ شروع کردیے ہیں۔ انہوں نے کہا کہ گزشتہ روز میڈل ایسٹ سے آئے ہوئے 189 مسافروں میں صرف 1 مسافر کا ٹیسٹ مثبت آیا اور 172 مسافروں کے ٹیسٹ منفی آنے کے بعد ان کو گھروں کو بھیج دیا گیا جبکہ 16 مسافروں کے ٹیسٹ نتائج آنا باقی ہے۔
کورونا کے حوالے سے انہوں نے کہا کہ گزشتہ 24 گھنٹوں میں کورونا وائرس کے نئے 93 کیسز رپورٹ ہوئیں جس سے صوبے میں کل کیسز کی تعداد 1 ہزار 77 ہوگئی ، کورونا وائرس سے 216 مریض صحتیاب اور مجموعی طور 5ہزار 945 افراد کے ٹیسٹ ہو چکے ہیں جبکہ 50 افراد کی کورونا وائرس سے ہلاکت ہو چکی ہے۔
اجمل وزیر نے پشاور میں کورونا وائرس پھیلنے کا خدشہ ظاہر کرتے ہوئے کہا کہ پشاور میں کورونا کیسز کی تعداد بڑھ رہی ہے ۔ اس لیے عوام کی خاطر سخت اقدامات اُٹھار رہے ہیں۔ عوام احتیاط کی خاطر گھروں تک محدود رہیں کیونکہ پشاور سمیت اپر دیر اور بونیر میں کورونا کسز میں اضافہ باعث تشویش ہے۔
اے پی پی /صائمہ حیات /قرۃالعین
