پشاور، 6جون(اے پی پی): مشیر اطلاعات خیبر پختونخوا اجمل خان وزیر نے کہا ہے کہ وزیراعظم عمران خان کے ویژن کے مطابق وزیراعلی محمود خان کی قیادت میں صوبے میں کورونا کے خلاف موثر اقدامات کئے جارہے ہیں، لاک ڈاؤن سے متاثرہ خاندانوں کے لیے حکومت نے احساس ایمرجنسی کیش پروگرام شروع کیا ہے جو ملک کی تاریخ کا شفاف ترین منصوبہ ہے ۔
انہوں نے کہا کہ ملک کی تاریخ میں پہلی مرتبہ قومی رابطہ کمیٹی میں تمام صوبوں کے وزرائے اعلی سمیت وزیر اعظم آزاد کشمیر سے مشاورت کی جاتی ہے جسکا کریڈٹ وزیر اعظم عمران خان کو جا تا ہے۔ اجمل وزیر نے تارکین وطن ملک واپسی کے لیے اٹھائے گئے اقدامات کے بارے میں کہا کہ حکومت اوورسیز پاکستانیوں کے مسائل کے لیے سنجیدہ اقدامات اٹھا رہی ہے،اوورسیز پاکستانی
وزیر اعظم عمران خان کے دل کے قریب ہیں اور وزیراعلی کی خصوصی درخواست پر باچا خان انٹرنیشنل ائیرپورٹ سے تارکین وطن لانے کے لئے فلائٹ آپریشن شروع ہوچکا ہے،جبکہ بیرون ملک میں مقیم پاکستانیوں کی میتیں بھی لائی جارہی ہیں۔ مختلف خلیجی ممالک سے اپریل سے مئی تک 23 خصوصی پروازوں کے ذریعے چار ہزار سے زائد تارکین وطن ملک پہنچے ہیں اور مزید اوورسیز کی آمد کا سلسلہ بھی جاری ہے۔ لاک ڈاؤن سے پہلے صرف دو مہینوں میں 81000 سے زائد مسافر باچا خان ائیرپورٹ کے ذریعے ملک آئے ہیں۔انہوں نے بتایا کہ تمام مسافروں کو مکمل سکریننگ کے بعد گھروں کو منتقل کیا جاتا ہے جبکہ کورونا سے متاثرہ مریضوں کو قرنطینہ سنٹرز میں رکھا جاتا ہے۔افغانستان سے آنے والے پاکستانیوں کے لئے بھی ضلع خیبر میں قرنطینہ مراکز قائم کئے گئے ہیں۔
مشیر اطلاعات کا کہنا تھا کہ وزیر اعلیٰ محمود خان کی قیادت میں ضم شدہ اضلاع کی تیز تر ترقی کا عمل جاری ہے۔ آنے والے بجٹ میں ضم اضلاع کی ترقی کے لیے خاطر خواہ رقم مختص کریں گے۔
اجمل وزیر نے ڈاکٹرز و دیگر طبی عملے کی خدمات کو سراہتے ہوئے کہا کہ ہمارے ڈاکٹرز اور طبی عملہ کم وسائل کے باوجود کورونا کے خلاف برسر پیکار ہیں۔ ڈاکٹرز اور طبی عملہ ہمارے ہیروز
ہیں ،مشکل کی اس گھڑی میں انکی خدمات ہمیشہ یاد رکھی جائیں گی۔
صوبے میں لاک ڈاؤن میں نرمی کے حوالے سے اجمل وزیر کا کہنا تھا کہ وزیراعظم عمران خان کو ہمیشہ غریب اور مزدور طبقے کی فکر رہتی ہے،لاک ڈاؤن میں نرمی میں بھی غریب طبقے کی مشکلات کو مدنظر رکھ کر کی گئی ہے ۔حکومت کو دو چیلنجز کا سامنا ہے، ایک طرف کورونا سے لڑنا ہے اور دوسری جانب معیشت کا پہیہ چلانا ۔تمام کاروباروں کو ایس او پیز کے تحت کھولنے کی اجازت دی ہے، عملدرآمد نہ ہونے کی صورت میں ضلعی انتظامیہ ایکشن لے رہی ہے۔ انہوں نے تاجر برادری سے اپیل کی ہے کہ احتیاطی تدابیر پر عملدرآمد کو یقینی بنائیں ۔
وی این ایس ، پشاور
