لاہور، 24 ستمبر(اے پی پی): صوبائی وزیر صنعت و تجارت میاں اسلم اقبال نے کہا کہ حکومت کا ہر قدم ،قوم کے روشن مستقبل کی جانب بڑھ رہا ہے۔ پرامن، خوشحال اور کرپشن سے پاک نیاپاکستان ہماری منزل ہے۔
جمعرات کو یہاں پارٹی عہدیداروں اور کارکنوں سے خطاب کے دوران ان کا کہنا تھا سیاست کوذاتی مفادات کے لئے استعمال کرنے والی اپوزیشن افراتفری کے ذریعے عوام کے لئے مشکلات پیدا کرنا چاہتی ہے۔ قومی وسائل کی لوٹ مار سے بیرون ممالک محلات کھڑے کرنے والوں کے عزائم سے عوام آگاہ ہیں۔ غریب قوم کی محنت کی کمائی پر ہاتھ صاف کرنے والوں کے منہ سے عوام کی ہمدردی کی باتیں جچتی نہیں ہیں۔
صوبائی وزیر نے کہا کہ ترقی کے نام پر دھوکہ دینے والے سابق حکمرانوں نے ملک اور قوم پر بڑا ظلم کیا ہے۔ پہلے قومی وسائل کو لوٹا اور اب لوٹی ہوئی دولت بچانے کیلئے اکٹھے ہوگئے ہیں۔ قومی دولت کے ان لٹیروں کا احتساب ہر پاکستانی کے دل کی آواز ہے۔
میاں اسلم اقبال نے کہا کہ عوام نے 2018 کے انتخابات میں جھوٹ، منافقت اور کرپشن کی سیاست کا باب ہمیشہ کے لئے بند کردیا، اپوزیشن افراتفری اور انتشار کی بجائے تعمیری سیاست کرے۔
میاں اسلم اقبال نے کہا کہ عوام کی محرومیوں کو خوشیوں میں بدلنے کے لئے انقلابی فلاحی پروگرام کامیابی سے جاری ہیں۔ حکومت گرانے کے خواب دیکھنے والوں کو ترقی کرتا اور مضبوط ہوتا ہواپاکستان گوارا نہیں ہے۔ عوام ملک کی ترقی چاہتی ہے، وہ کسی کو بھی ترقی کے سفر میں حائل نہیں ہونے دیں گے۔
میاں اسلم اقبال نے کہا کہ پارٹی کارکن ہمارا قیمتی اثاثہ، ترقی کے عمل میں انکی آراء اور تجاویز بے حد اہم ہیں۔
