لاہور، 14 ستمبر (اے پی پی): صوبائی وزیرِ اطلاعات پنجاب فیاض الحسن چوہان نے اپنے پیغام میں کہا کہ اپوزیشن یاد رکھے عمران خان نہ خود کرپشن کرتے ہیں اور نہ کسی دوسرے کو کھانے دیتے ہیں۔ انہوں نے کہا کہ عمران خان ریاست کے خزانے کے امین ہیں، خیانت نہیں کریں گے۔
فیاض الحسن چوہان نے کہا کہ ن لیگ حسبِ سابق حمزہ شہباز کی بیماری پر بھی سیاست کرنے کی کوشش کر رہی ہے اورحمزہ شہباز کا پہلے چغتائی لیب اور دوسری دفعہ سرکاری سطح پر ٹیسٹ کیا گیا اور کرونا ٹیسٹ مثبت آیا۔
انہوں نے بتایا کہ بزدار حکومت نے فوری طور پر جناح ہسپتال کے پروفیسر عباس رضا کی سربراہی میں میڈیکل بورڈ تشکیل دے دیا ہے۔ ڈاکٹرز اور پروفیسرز حمزہ شہباز کا مکمل طبی معائنہ کریں گے۔ اس کے بعد حمزہ شہباز کو کسی سرکاری ہسپتال شفٹ کرنے کا فیصلہ کیا جاۓ گا۔
صوبائی وزیر نے کہا کہ ن لیگ کا حمزہ شہباز کو اتفاق ہسپتال یا رائیونڈ محل شفٹ کرنے کا مطالبہ آئین اور قانون کے خلاف ہے۔ انہوں نے کہا کہ مولانا فضل الرحمان کے دل کی بات آخر لب پر آ ہی گئی، مولانا کہتے ہیں اے پی سی طے کرے سارا حلوہ حکومت کھاۓ گی یا ہمیں حصہ دیا جاۓ گا۔
انہوں نے کہا کہ مولانا کی منفی سوچ اور فکر قوم کے سامنے آشکار ہو گئی ہے۔ مولانا قوم کی دولت اور ملکی خزانے کو ہمیشہ حلوہ سمجھتے رہے ہیں۔ حلوائی کی دکان پر نانا جی کی فاتحہ کے مصداق آل پاکستان لوٹ مار ایسوسی ایشن نے عشروں ملک کو لوٹا ہے۔
