لاہور،23ستمبر(اے پی پی): وزیراعلیٰ پنجاب سردارعثمان بزدار نے لاہور کے مسائل حل کرنے کے لئے تین گھنٹے طویل اجلاس کی صدارت کی۔ اجلاس میں لاہور کے مسائل کے حل کیلئے لائن آف ایکشن پر پیش رفت کا جا ئزہ لیاگیا۔ ہر محکمے نے ایک ماہ کے دوران مسائل کے حل کے حوالے سے کیے جانے والے اقدامات کے حوالے سے بریفنگ دی۔ وزیر اعلی پنجاب نے کہا کہ لاہورپاکستان کا دل ہے۔ لاہور کے مسائل کو سب کی مشاورت سے حل کرنے کی حکمت عملی بنائی ہے۔ اراکین قومی و صوبائی اسمبلی اور تحریک انصاف کے عہدیداران کااس ضمن میں کلیدی کردار ہوگا۔ عثمان بزدار نے کہا کہ تحریک انصاف کے منتخب نمائندوں اورعہدیداران کو اونر شپ دیں گے۔ لاہورشہرمیں بسنے والوں کے مسائل کے حل کیلئے جو کچھ انسانی بس میں ہوا کرگزریں گے۔ خالی باتوں اور پریزنٹیشن سے کام نہیں چلے گا،عملی طورپر کام کر کے دکھاناہوگا۔ وزیر اعلی پنجاب نے کہا کہ جو کام نہیں کرے گا اس کے خلاف ایکشن لیا جائے گا۔ میں ہر ماہ دیئے گئے ہدف پر ہونے والی پیش رفت کا خود جائزہ لوں گا۔لاہور شہرکیلئے میگاپراجیکٹس بھی شروع کیے جائیں گے۔انھوں نے ہدایت دی کہ روزمرہ کے ایشوز کو انتظامیہ اورپولیس ترجیحی بنیادوں پر حل کریں۔ کارکردگی بہتر بنانا ہوگی۔ عثمان بزدار نے کہا کہ صفائی کے نظام کومستقل بنیادوں پر درست کیا جائے گا۔لاہور میٹروپولیٹن کارپوریشن سے متعلق بھی بہت شکایت ہیں۔کارپوریشن کے حکام اپنی کارکردگی بہتر بنائیں۔ انھوں نے کہا کہ منتخب نمائندے بھی فیلڈ میں نکلیں،عوامی مسائل کا خود جائزہ لیں۔ وزیراعلیٰ آفس کو عوامی مسائل سے آگاہ کریں۔وزیراعلیٰ عثمان بزدار نے عوامی مسائل کے حل کی مستقل مانیٹرنگ کے لئے کمیٹی تشکیل دینے کی ہدایت بھی دی۔ وزیر اعلی پنجاب نے کہا کہ جو ٹاسک دیئے ہیں وہ ہر صورت پورے ہونے چاہئیں۔ کوئی بہانہ بازی نہیں چلے گی۔ پارکنگ ایشوزکے حل،ٹریفک مینجمنٹ کی بہتری اورجرائم کے خاتمے کے حوالے سے ٹھوس اقدامات چاہتا ہوں۔ وزیر اعلی نے کہا کہ شہر میں گداگروں کے خلاف بھر پور مہم چلائی جائے۔ سڑکوں پر گداگرنظر نہیں آنے چاہئیں۔ گدا گروں کو Beggar homeمیں رکھا جائے۔ اور منشیات کے عادی افراد کے خلاف کریک ڈاؤن میں مزید سختی کی جائے۔ انھوں نے ہدایت دی کہ سٹریٹ لائٹوں کی بحالی کا کام جلد سے جلد مکمل کیا جائے۔ تجاوزات کے رحجان کے خاتمے کے لئے موثر منصوبہ بندی کر کے عملی اقدامات اٹھائے جائیں۔ صوبائی وزراء،اراکین قومی وصوبائی اسمبلی اورپی ٹی آئی کے رہنماؤں نے لاہور کے مسائل کے حل کیلئے تجاویز بھی دیں۔
