لاہور،23 ستمبر(اے پی پی): صوبائی وزیر صنعت و تجارت میاں اسلم اقبال کی زیر صدارت پنجاب سرمایہ کاری بورڈ کے کمیٹی روم میں اہم اجلاس منعقد ہوا جس میں صوبے کے صنعتی مراکز کی آباد کاری اور ترقیاتی کاموں پر پیش رفت کا جائزہ لیا گیا۔
چئیرمین پیڈمک نبیل ھاشمی کی انڈسٹریل اسٹیٹس میں صنعتکاری اور ترقیاتی سکیموں پرپیش رفت بارے بریفنگ بھی دی گئی ۔
صوبائی وزیر نے صنعتی مراکز میں ترقیاتی کام تیزی سے مکمل کرنے کی ہدایت دیتے ہوئے کہا کہ انڈسٹریل اسٹیٹس میں بجلی، گیس اور دیگر مسائل کے فوری حل کے لئے وفاقی حکومت سے رابطہ کیا جائے گا،صنعتی مراکز میں مسائل کی نشاندہی اور انکے حل کیلئے سٹیک ہولڈرز سے مشاورت سے اقدامات کئے جائینگے۔
انہوں نے کہا کہ پنجاب حکومت صوبے میں 13سپیشل اکنامک زونز پر کام کر رہی ہے۔ یہ خصوصی اقتصادی زونز ملک اور قوم کی تقدیر بدل دیں گے،صنعتی مراکز میں نئی صنعتیں لگنے سے اربوں روپے کی سرمایہ کاری آرہی ہے۔
انہوں نے کہا کہ انڈسٹریل اسٹیٹس کی آباد کاری سے روز گار کے لاکھوں نئے مواقع پیدا ہوں گے، قائداعظم بزنس پارک صنعتی ترقی کے حوالے سے ایک سنگ میل ہے۔ صوبائی وزیر نے کہا کہ جنوبی پنجاب میں ہزاروں ایکڑ رقبے پر بننے والے صنعتی مراکز سے خطے میں معاشی انقلاب آئے گا۔
انہوں نے ہدایت دی کہ پیڈمک انڈسٹریل اسٹیٹس کی آباد کاری اور ترقیاتی کاموں کی جلد تکمیل کے لئے متحرک ہو کر کام کرے۔
