وادی نیلم/ہلمت ، 25 ستمبر (اے پی پی): وزیراعظم آزادکشمیر راجہ فاروق حیدر خان نے کہا ہے کہ لائن آف کنٹرول پر ہندوستانی فوج کی جارحیت کا نشانہ عورتیں بچے اور بزرگ ہیں، مختلف ممالک کے سفرا اتاشیوں بین الاقوامی میڈیا کے دورہ لائن آف کنٹرول کا خیر مقدم کرتے ہیں، بین الاقوامی وفد نے خود آکر دیکھا کس طرح ہندوستان کلسٹر ایمونیشن استعمال کرکہ معصوم شہریوں کی جانیں لے رہا ہے۔
ان خیالات کا اظہار انہوں نے جمعہ کو لائن آف کنٹرول پر جلسہ عام سے خطاب کرتے ہوئے کیا۔ عوام نے وزیراعظم آزادکشمیر کو اپنے درمیاں پاکر خوشی کا اظہار شاندار استقبال کیا۔ وزیر اعظم آزاد کشمیر نے کہا کہ لائن آف کنٹرول پر ہندوستانی فوج آزادکشمیر کے شہریوں پر ممنوعہ و مہلک ہتھیار استعمال کررہا ہے۔ مقبوضہ کشمیر میں انسانی حقوق کی خلاف ورزیوں پردہ ڈالنے کے لیے لائن آف کنٹرول پر نہتے معصوم لوگوں کو نشانہ بنا رہا ہے۔
انہوں نے کہا کہ کوئی بھی فوج عوامی تعاون کے بغیر لڑائی نہیں لڑسکتی۔ لائن آف کنٹرول پر ہندوستانی فوج کے سامنے ڈٹے رہنے والے لوگوں کو سلام پیش کرتا ہوں۔ ہندوستان چاہتا ہے لوگ لائن آف کنٹرول سے پیچھے ہٹ جائیں کشمیری دفاع وطن کے لیے پاک فوج کے ساتھ کھڑے ہیں۔
