ملتان،17اکتوبر(اے پی پی):جنوبی پنجاب کا دل ملتان ڈیجیٹلائزیشن کی شاہراہ پر چل نکلا، اراضی ریکارڈ سنٹر کے قریب 8 کنال سے زائد رقبہ پر تعمیر کئے گئے ای خدمت سنٹر نے کام شروع کر دیا ہے۔ڈپٹی کمشنر عامر خٹک نے ای خدمت سنٹر کا دورہ کیا۔اس موقع پر منیجر ای خدمت سنٹر عبدالروف نے ڈپٹی کمشنر کو ای سنٹر سے متعلق بریفنگ دی۔
بریفنگ میں بتایا گیا کہ ای خدمت سنٹر میں 78 مختلف خدمات شہریوں کو فراہم کی جارہی ہیں اور 34 خدمات کنسٹرکشن اور 9 خدمات ایکسائز ڈیپارٹمنٹ کے حوالے سے فراہم کی جارہی ہیں، ای خدمت سنٹر میں تمام نظام کمپیوٹرائزڈ ہے۔
بریفنگ میں بتایا گیا کہ پنجاب انفارمیشن ٹیکنالوجی بورڈ کا 55 اہلکاروں پر مشتمل سٹاف شہریوں کو سروس فراہم کررہا ہے اور شہریوں کو صوبائی اور وفاقی دونوں محکموں سے متعلق تمام سروسز فراہم کرنے کے لئے 24 کاونٹرز قائم کئے گئے ہیں۔انہوں نے بتایا کہ ای خدمت سنٹر کی تعمیر پر15 کروڑ روپے لاگت آئی ہےاور خدمت سنٹر میں ڈومیسائل،برتھ،میرج سرٹیفکیٹ جاری کئے جاتے ہیں۔
بریفنگ میں بتایا گیا لرنر ڈرائیونگ لائسنس،نقشہ جات، روٹ پرمٹ،گاڑیوں کی رجسٹریشن اور ٹوکن ٹیکس کی ادائیگی کی سروس دی جارہی ہے اور نقشہ،بجلی، گیس کے کنکشن اور ضمانت کے لئے فرد ملکیت بھی ای خدمت سنٹر سے جاری کی جارہی ہے۔
اس موقع پر ڈپٹی کمشنر نے کہا کہ پبلک سروس ڈیلیوری بہتر بنانے کے لئے ای خدمت سروس کا قیام ایک انقلابی قدم ہے اور کہا کہ ای خدمت سنٹر میں سروسسز کی فراہمی میں وقت کی بچت ہوگی، ای خدمت سنٹر میں تمام پبلک سروس فراہم کرنے کے کاونٹرز کھولے جائیں گے۔
عامر خٹک نے کہا شہری کو ڈومیسائل، لائسنس وغیرہ تیار ہونے پر میسج کے ذریعے آگاہ کیا جائے گا۔انہوں نے ای خدمت سنٹر انتظامیہ کو ہدایت دی کہ دوسری بار شہریوں کو سنٹر نہ آنا پڑے، شہریوں کو مطلوبہ ڈاکومنٹ کورئیر سروس کے ذریعے گھر فراہم کیا جائے۔
ڈپٹی کمشنر نے اس بات کو خوش آئند قرار دیا کہ ضلع ملتان پاکستان کا پہلا ضلع ہے جہاں ای فائلنگ سسٹم لانچ کر دیا گیا ہے، ای فائلنگ سسٹم کے حوالے سے مختلف محکموں کی ٹریننگ شروع کر دی گئی ہے۔انہوں نے کہا کہ وقت کا تقاضا ہے کہ پیپر لیس سٹم کو اپنایا جائے،ای فائلنگ سے درخواست،رجسٹر یا فائل گم ہونے کے خدشات ختم ہو جائیں گے۔
