کوئٹہ، 13 اکتوبر (اے پی پی ): کشمیر کمیٹی کے چیئرمین و رکن قومی اسمبلی شہریار خان آفریدی نے کہا ہے کہ موجود حکومت نے کشمیر کے حوالے سے دنیا کی بڑی یونیورسٹیوں سے رجوع کرنے کا فیصلہ کیا ہے، وزیراعظم نے کشمیر سے متعلق اقوام متحدہ میں دو ٹوک بات کی۔انہوں نے کہا کہ اپوزیشن افواج پاکستان کو ہدف بنانے کے بجائے ایوان میں جنگ لڑئے، اپوزیشن کا بیانیہ بھارت کا بیان ہے بھارت میں اقلیت غیر محفوظ ہیں۔
ان خیالات کا اظہار انہوں نے منگل کو کوئٹہ پریس کلب میں اسلامک یوتھ آرگنائزیشن کے زیر اہتمام کشمیر پیس کانفرنس کے عنوان سے منعقدہ تقریب سے خطاب کرتے ہوئے کیا ۔ اس موقع پر صوبائی مشیر کھیل و ثقافت عبدالخالق ہزارہ ، بایزید خان کاسی ، سابق اسسٹنٹ اٹارنی جنرل ایم حسن مینگل ایڈووکیٹ ، اسلامک یوتھ آرگنائزیشن کے حماد کاکڑ ودیگر کے علاوہ معروف اداکار شان نے ٹیلی فون کے ذریعے شرکاسے خطاب کیا ۔ کانفرنس کے دوران شرکاسے خطاب کرتے ہوئے کشمیر کمیٹی کے چیئرمین شہریار آفریدی نے کہا کہ بلوچستان کے نوجوانوں کو دنیا کے ہر فورم پر متعارف کرائیں گے۔نوجوانوں کو تمام شعبوں میں آگے لائیں گے ، وزیر اعظم بلوچستان سے کوئی ناانصافی نہیں ہونے دینگے ۔ انہوں نے کہا کہ مذہب ، مسلک ، نسل ، زبان ، سوچ اور فکر کے نام پرملک اور بلوچستان کے لوگوں کو ٹارگٹ کیا گیا۔ دشمن مختلف حربوں سے حملے کررہا ہے لیکن بلوچستان کے نوجوان ہر سازش کو ایک ہوکر ناکام بنانے کی صلاحیت رکھتے ہیں ۔ پوری دنیا نے دیکھا کہ جب بھی آ فت آئی قوم ایک جان بنی ۔
شہریار آفریدی نے کہا کہ تحریک آزادی میں بلوچستان کے قبائل اور عوام کے کلیدی کردار سے انکار ممکن نہیں ، چاغی کے پہاڑ آج بھی دنیا کے ممالک کو پاکستان کے ایٹمی قوت ہونے کا پیغام دے رہے ہیں، بلوچستان کی تاریخ، روایات اور اقدار ہماری پہچان ہے۔ انہوں نے کہا کہ ملک کے دیگر علاقوں کو جو سہولیات حاصل ہیں ان سہولیات پر بلوچستان کا بھی حق ہے ۔ انہوں نے کہا کہ محنت اور دلیل اور سب کو ساتھ لیکر چلیں تو کامیابی یقینی ہے ۔ حکومت نے 172 ممالک کے ویزا اوپن کردیا ہے سیاح ملک کے کسی بھی کونے میں بغیر خوف و خطر کے جاسکتے ہیں جبکہ مقبوضہ کشمیر میں بھارت کے اپنے ہی لوگوں کو جانے کی اجازت نہیں ہے ۔ انہوں نے کہا کہ موجود حکومت نے کشمیر کے حوالے سے دنیا کی بہترین یونیورسٹیوں سے رجوع کرنے کا فیصلہ کیا ہے تاکہ وہاں کشمیر کے مسئلے اور پاکستان کے موقف کو دنیا کے سامنے رکھا جاسکے ۔ اپوزیشن پارلیمنٹ میں تعمیری تنقید کرے اداروں پر تنقید سے دشمن اور مودی کے بیانیہ کو تقویت مل رہی ہے ، اپوزیشن کے آل پارٹیز کانفرنس کے نکات میں کشمیر کیوں شامل نہیں ۔
انہوں نے کہاکہ بھارت پاکستان میں شیعہ سنی فسادات کرنے کے لئے منظم منصوبہ بندی پر عمل پیرا ہے اس کے لئے وہ سوشل میڈیا کے ذریعے پاکستان کے نوجوانوں کی غلط ذہن سازی کررہا ہے جبکہ انڈین میڈیا جس طرح زہرپاکستان کے خلاف اگل رہا ہے وہ سب کے سامنے ہیں ۔ انہوں نے کہاکہ بلوچستان کے نوجوانوں کو خود اپنے آپ کو منوانا ہوگا ۔
شہریار آفریدی نے کہا کہ ہم نے 40سال سے افغان بھائیوں کو گلے سے لگایا ہے مگر ملک کی سالمیت پر آنچ تک نہیں آنے دیں گے ۔ انہوں نے کہا کہ نئے پاکستان میں محرومی اور ناانصافی نہیں ہوگی۔
اس موقع پر وزیراعلیٰ بلوچستان کے مشیر برائے کھیل و ثقافت عبدالخالق ہزارہ نے کہا ک بلوچستان کی یوتھ سے مطمئن ہوں ۔ یہاں کے نوجوانوں میں وہ قوت ہے کہ بلوچستان اور پاکستان کو عظیم تر بناسکیں۔ اس موقع پر دیگر مقررین نے بھی خطاب کیا ۔
تقریب کے آخر میں کشمیر کمیٹی کے چیئرمین و رکن قومی اسمبلی شہریار آفریدی کو یادگاری شیلڈ پیش کی گئی ۔
اے پی پی/بلال/حامد
