لاہور، 24 نومبر (اے پی پی ): وزیراعلیٰ پنجاب سے چائنہ پاکستان اکنامک کوریڈور اتھارٹی کے چیئرمین لیفٹیننٹ جنرل (ر) عاصم سلیم باجوہ نے منگل کو یہاں ملاقات کی ہے ، ملاقات میں پنجاب میں سی پیک کے تحت جاری منصوبوں پر ہونے والی پیش رفت پر تبادلہ خیال سمیت لاہور میں چائنہ سینٹر / سی پیک ٹاور بنانے کی تجویز پر اتفاق کیا گیا۔ سیڈ ڈویلپمنٹ اور زرعی شعبہ سے متعلقہ ریسرچ کو فروغ دینے کیلئے مربوط اقدامات اٹھانے کا فیصلہ کیا گیا۔
وزیر اعلیٰ عثمان بزدار نے کہا سیڈ ڈویلپمنٹ اور دیگر زرعی تحقیقاتی مقاصد کیلئے 13 ہزار ایکڑ اراضی استعمال کی جائے گی، چائنہ سینٹر / سی پیک ٹاور میں صنعتکاروں اور سرمایہ کاروں کیلئے انفارمیشن ڈیسک بنائے جائیں گے، پاکستانی تاجروں اور صنعتکاروں کو چینی انڈسٹریز سے متعلق معلومات ایک ہی چھت تلے میسر ہوں گی۔
انہوں نے کہا چین کے سرمایہ کاروں کو پنجاب میں انڈسٹری لگانے میں ہر ممکن معاونت کریں گے، پنجاب میں بیرونی سرمایہ کاروں کو تحفظ، سہولتیں اور رعائتیں فراہم کی جائیں گی، صنعتی پلاٹوں کی الاٹمنٹ کیلئے قواعد و ضوابط اور ٹرانسپیرنسی کو ملحوظ خاطر رکھا جائے، صنعتی ترقی کیلئے رہنما اصولوں پر پوری طرح عملدرآمد یقینی بنایا جائے،صنعتکاروں کے مسائل کے حل کیلئے قابل عمل تجاویز پیش کی جائیں، صنعتی ترقی کیلئے ریگولیشن کو جلد از جلد حتمی شکل دی جائے، سی پیک سے پاک چین تعلقات کو نئی جہت ملی ہے۔
لیفٹیننٹ جنرل (ر) عاصم سلیم باجوہ نے کہا سی پیک منصوبہ پاکستانی معیشت کے استحکام کے لئے خصوصی اہمیت رکھتا ہے، سی پیک منصوبوں پر کام کی رفتار کو مزید تیز کیا گیاہے۔ زرعی شعبے میں ترقی کے بے پناہ مواقع ہیں، زرعی شعبے میں چین کے تجربے اور مہارت سے استفادہ کریں گے۔سی پیک پراجیکٹس کی تکمیل سے پاکستانی معیشت مضبوط ہو گی۔
