لاہور،12نومبر(اے پی پی): گورنر پنجاب چوہدری محمد سرور نے کہاہے کہ قبل از وقت انتخابات کی خواہش رکھنے والے 2023تک صبر کر یں، آئینی مدت پوری ہونے سے ایک دن بھی پہلے حکومت جانیوالی نہیں۔انہوں نے کہا کہ وزیراعظم عمران خان بلیک میل ہونیوالا نہیں ڈٹ جانیوالالیڈر ہے۔حکومت اور عمران خان بطور وزیر اعظم اپنی آئینی مدت پوری کرینگے ۔
ان خیالات کا اظہار گورنر پنجاب چوہدری محمد سرور نے اراکین پارلیمنٹ،ایم این اے صداقت عباسی، ایم اےاین فیض اللہ اور دیگر سے ملاقات کے دوران کیا۔
چوہدری محمدسرور نے کہا کہ ملکی ترقی کی راہ میں رکاوٹیں ڈالنے والوں کو ناکام بنائیں گے،حکومتی ایجنڈہ عام آدمی کو مضبوط بنانا اور انکو ہر شعبے میں ریلیف دینا ہے ۔انہوں نے کہا کہ قومی اداروں کو تنقید کا نشانہ بنانیوالوں کو قوم معاف نہیں کر یگی۔
گورنر پنجاب نے کہا کہ عام انتخابات 2023میں ہی ہوں گے اور مخالفین پھر ناکام ہونگے،حکومت ملک میں شفافیات اور بلاتفر یق احتساب کو یقینی بنا رہی ہے ۔انہوں نے کہا کہ پاکستان کو آگے بڑھنے سے اب کوئی نہیں روک سکتا۔
چوہدری محمدسرور نے کہا کہ عوام حکومت، جمہوریت اور پار لیمنٹ کیساتھ متحد کھڑے ہیں اورہر گزرتے دن کیساتھ پاکستان کامیابی سے آگے بڑھ رہا ہے ۔
