سکھر۔07نومبر(اے پی پی ): سید خورشید احمد شاہ،ان کی دو بیگمات،دو صاحبزادوں ،داماد صوبائی وزیر اویس شاہ سمیت 18 ملزمان کے خلاف ایک ارب 23 کروڑ روپے سے زائد اثاثے بنانے کے الزام میں داخل کیس کی سماعت سکھر کی احتساب عدالت میں ہوئی تاہم سماعت کے دوران ریفرنس میں نامزد کچھ ملزمان پیش نہیں ہوئے جس پر عدالت نے سماعت 9 نومبر تک ملتوی کردی تاہم آج کی سماعت پر بھی ملزمان کے خلاف نہ حتمی ریفرنس داخل ہوسکا اور نہ ہی ان پر فرد جرم عائد کی جاسکی ۔
سماعت کے موقع پرخورشید احمدشاہ کو ایمبولینس میں این آئی سی وی ڈی اسپتال سے عدالت لایا گیا جبکہ صوبائی وزیر اویس شاہ و دیگر ملزمان بھی عدالت میں پیش ہوئے ۔سکھر انتظامیہ کی جانب سے سماعت کے موقع پر عدالت کے باہر سیکیورٹی کے سخت انتظامات کیے گئے۔
