شکرگڑھ،02 نومبر ( اے پی پی): وزیر اعلی پنجاب کی ہدایت پر ڈپٹی کمشنر نارووال مہر شاہد زمان لک کی زیرنگرانی ضلع کی تینوں تحصیلوں میں کھلی کچہری کا انعقاد کیا گیا۔
اس موقع پر ڈپٹی کمشنر نارووال مہر شاہد زمان لک نے تحصیل ہیڈ کواٹرز نارووال پر ریونیو کھلی کچہری میں آنے والے سائلین کی شکایات کو سنا اور ان حل کے لئے متعلقہ افسران کو ہدایات جاری کیں۔
ڈپٹی کمشنر نارووال نے کہا کہ وزیر اعلی پنجاب کی طرف سے ماہانہ ریونیو کھلی کچہری کے انعقاد سے لوگوں کو روز مرہ کے معاملات، وراثتی انتقالات، فرد و رجسٹریشن،ناجائز قبضہ، ڈومی سائل کے حصول کے علاوہ دیگر مسائل کو حل کرنے میں بھرپور مدد ملے گی۔
ڈپٹی کمشنر نارووال نے ریونیو افسران کو ہدایت کی کہ وہ لوگوں کے مسائل کے فوری ازالے کے لئے اپنے آپ کو وقف کریں، اور شہریوں کی شکایات کو ترجیحی بنیادوں پر حل کریں اس حوالے سے کسی قسم کی غفلت برداشت نہیں کی جائے گی، کیونکہ لوگوں کے مسائل کا فوری ازالہ حکومت کی اولین ترجیح ہے۔
انہوں نے کہا کہ قبضہ مافیا کے دن گنے جاچکے ہیں، اور حکومت بلاتفریق قبضہ مافیا کے خلاف کاروائی عمل میں لائے گی، اس سلسلہ میں جلد ہی کریک ڈاون شروع کیا جارہا ہے ۔
ڈپٹی کمشنر نارووال نے ریونیو عملہ کو ہدایت کی کہ وہ عوامی شکایات کے فوری ازالے کے لئے بلاخوف و خطر کام کریں-
اس موقع پر اے ڈی سی آر ڈاکٹر فیصل سلیم اور اسسٹنٹ کمشنر نارووال سیدہ تہنیت بخاری و دیگر ریونیو افسران بھی موجود تھے ۔
