ملتان، 3نومبر(اے پی پی ): اے ڈی سی ہیڈ کوارٹر رانااخلاق احمد خان کی زیر صدارت کورونا ایس او پیز پر عملدر آمد اور سموگ کے تدارک متعلق اجلاس ہوا۔ کورونا کے بڑھتے ہوئے کیسسز کے پیش نظر بسوں اور ویگنوں میں ایس او پیز پر عملدرآمد کرانے کا فیصلہ کیا گیا ۔
اے ڈی سی ہیڈ کوارٹر رانااخلاق احمد خان نے کہا کہ ٹرانسپورٹ مالکان کورونا ایس او پیز پر عملدرآمد کے ذمہ دار ہونگے، مسافروں کو ماسک پہننے کا پابند بنایا جائے۔ انہوں نے کہا کہ مسافروں کی انتظار گاہوں میں سماجی فاصلے کی ہدایات پر عمل کیا جائے،دھواں چھوڑنے والی گاڑیوں کو کسی صورت سڑکوں پر نہیں آنے دیا جائیگا۔
اے ڈی سی ہیڈکوارٹر نے کہا کہ غیر معیاری سلنڈرز استعمال کرنیوالی گاڑیوں کے مالکان کے خلاف مقدمات درج کرائے جائیں،تمام کمرشل اور نان کمرشل گاڑیوں سے غیر معیاری اور ناقص گیس سلنڈر اتارے جائیں۔انہوں نے کہا کہ غیر معیاری گیس سلنڈر تیار اور فروخت کرنیوالوں کے خلاف بھی کارروائی کی جائے گی ، اے سیز اور محکمہ سول ڈیفنس ایل پی جی کی غیر قانونی فلنگ کرنیوالوں کے خلاف سخت ایکشن لیں گے۔
اجلاس میں موٹر وہیکل ایگزامینر،سول ڈیفنس آفیسر، ٹریفک پولیس اور ٹرانسپورٹ مالکان کے نمائندوں نےشرکت کی ۔
