مظفرآباد،15نومبر(اے پی پی):لائن آف کنٹرول پر ہندوستانی فوج کی فائرنگ سے زخمی ہونیوالے افراد کی عیادت کیلئے وزیراعظم آزادکشمیر راجہ فاروق حیدر خان نے شیخ خلیفہ ہسپتال کا دورہ کیا۔وزیراعظم آزادکشمیر نے زخمیوں میں امدادی رقوم کے چیک تقسیم کیے۔ وزیراعظم راجہ فاروق حیدر خان نے پاک فوج کے زخمی جوانوں کی بھی عیادت کی۔
اس موقع پرانہوں نے کہا کہ لائن آف کنٹرول پر رہنے والے عوام کی قربانیاں رنگ لائیں گی،پاک فوج نے ہندوستان کو دندان شکن جواب دیکر زخمیوں اور شہدا کا بدلہ لیا ہے۔
راجہ فاروق حیدر نے کہا کہ لائن آف کنٹرول پر ہندوستان نے انسانیت کی تمام اقدار و بین الاقوامی قوانین کی خلاف ورزی کی اور بزدلوں کی فوج نے نہتے لوگوں، معصوم بچوں اور ان کے گھروں کو نشانہ بنایا۔
انہوں نے کہا کہ مقبوضہ کشمیر میں تحریک مزاحمت میں بدترین محاصرے کے باوجود تیزی سے مودی بوکھلا گیا ہے اور سیز فائر لائن پر فائرنگ مقبوضہ کشمیر کے بدترین حالات سے توجہ ہٹانے کے لیے کی جارہی ہے۔
