اسلام آباد۔17دسمبر (اے پی پی):صدر مملکت ڈاکٹر عارف علوی نے کہا ہے کہ افراد باہم معذوری کیلئے معاون ٹیکنالوجی کوعالمی اور علاقائی سطح پر پذیرائی حاصل ہورہی ہے، خصوصی افراد کی معاون ٹیکنالوجی تک رسائی میں بہتر ی لانے اور مالی اور معاشرتی طور پر قومی دھارے میں شریک کرنے کیلئے اقدامات کررہےہیں۔ ان خیالات کااظہارانہوں نے جمعرات کو اپنی زیرِ صدارت معاون ٹیکنالوجی برائے افراد باہم معذوری پر اجلاس سے خطاب کرتے ہوئے کیا۔ اجلاس میں عالمی ادارہ صحت کے نمائندہ، ڈاکٹرپلیتھا ماہی پالا اور ایم ڈی پاکستان بیت المال ، عون عباس بپی نے شرکت کی۔ اجلاس میں عالمی ادارہ صحت اور وفاقی وزارتِ صحت کے اعلیٰ حکام بھی شریک ہوئے۔ ڈاکٹر پلیتھا ماہی نے صدر مملکت کو معاونِ ٹیکنالوجی برائے افراد باہم معذوری پر تفصیلی بریفنگ دی۔اجلاس کو معاون ٹیکنالوجی کے حوالے سے عالمی ادارہ صحت کے اقدامات کے بارے میں بھی بریفنگ دی گئی۔ اعلامیے کے مطابق معاون ٹیکنالوجی افراد باہم معذوری کو بصارت، سماعت ، نقل وحرکت سمیت چھ بنیادی خدمات فراہم کرے گی۔ اجلاس سے خطاب کرتے ہوئے صدر مملکت ڈاکٹر عارف علوی نے کہا کہ افراد باہم معذوری اورغیر متعدی امراض سے متاثرہ افراد تک جدید ٹیکنالوجی کے فوائد پہنچانے کی ضرورت ہے۔ انہوں نے کہا کہ افراد باہم معذوری تک معاوِن ٹیکنالوجی کی رسائی بہتر بناکر ان کو درپیش چیلنجزسے نمٹا جا سکتا ہے۔ افراد باہم معذوری معاون ٹیکنالوجی کے استعمال سے اپنے لیے آسانیاں پیدا کر سکتے ہیں۔ انہوں نے کہا کہ افراد باہم معذوری کیلئے معاون ٹیکنالوجی کوعالمی اور علاقائی سطح پر پذیرائی حاصل ہورہی ہے۔ صدر مملکت نے کہا کہ خصوصی افراد کی معاون ٹیکنالوجی تک رسائی میں بہتر ی لانے اور مالی اور معاشرتی طور پر قومی دھارے میں شریک کرنے کیلئے بھی اقدامات کررہےہیں۔ صدر مملکت ڈاکٹر عارف علوی نے معاون ٹیکنالوجی برائے افراد باہم معذوری پر عالمی تعاون بڑھانے پرعالمی ادارہ صحت کی کاوشوں کو سراہا۔
