لاہور7دسمبر(اے پی پی) :وزیراعلیٰ پنجاب سردار عثمان بزدار نے جیلانی پارک میں گل داؤدی کی نمائش کے افتتاح کے بعد میڈیا سے گفتگو کی۔سردار عثمان بزدار کا کہنا ہے کہ کورونا ایس او پیز کے تحت محدود اجتماعات کی اجازت ہے۔غیر قانونی اجتماعات کی کسی صورت اجازت نہیں دی جا سکتی۔انہوں نے کہا ایس او پیز کے تحت گل داؤدی کی نمائش کی اجازت دی ہے۔نمائش دیکھنے والے لوگوں کو ایس او پیز کے تحت پارک میں داخلے کی اجازت ہوگی۔پوری دنیا میں کورونا کی دوسری لہر کے باعث کوئی اجتماعات نہیں ہو رہے ہیں۔عثمان بزدار نے کہا کہ دنیا کورونا سے بچنے کیلئے اقدامات کر رہی ہے اور ہمارے یہاں اجتماعات کئے جا رہے ہیں۔ بدقسمتی سے یہاں کورونا کے بڑھتے ہوئے کیسز کے باوجود سیاسی اجتماعات کئے جا رہے ہیں۔انہوں نے مزید کہا کہ ایسی سرگرمیوں سے گریز کرنا چاہیئے جس سے کورونا پھیلے۔اپوزیشن کو عوام کی زندگیوں سے نہیں کھیلنا چاہیئے۔وزیر اعلی پنجاب کا کہنا ہے کہ غیر قانونی اجتماع کی اجازت دینا غیر قانونی اقدام ہوگا۔حکومت غیر قانونی سرگرمیوں کی کسی صورت اجازت نہیں دے گی۔ان کا کہنا ہے کہ عوام کی زندگیاں سب سے زیادہ عزیز ہیں۔سیاسی اجتماع کرکے آپ کیا پیغام دے رہے ہیں۔سردار عثمان بزدار نے میڈیا سے گفتگو کے دوران کہا کہ اپوزیشن کو نصیحت ہے کہ وہ اجتماعات سے اجتناب کرے۔غیر قانونی سرگرمیو ں پر قانون کے مطابق ایکشن ہوگا۔پی ایچ اے نے گل داؤدی کی بہترین نمائش کا اہتمام کیا ہے۔ اس نمائش کے شاندار انعقاد پر پی ایچ اے کو شاباش دیتا ہوں۔انہوں نے کہا کہ شہر کو مزید خوبصورت بنائیں گے۔قبل ازیں وزیراعلیٰ عثمان بزدار نے گل داؤدی کی نمائش دیکھی اور گل داؤدی کی مختلف اقسام میں گہری دلچسپی کا اظہار کیا۔
