اسلام آباد، 08 دسمبر (اے پی پی ): پاک بحریہ کے زیر انتظام 62 واں گوادر ڈے جوش و جذبے سے منایا جا رہا ہے، پرچم کشائی کی مرکزی تقریب گوادر میں پاک بحریہ کے یونٹ پی این ایس اکرم میں منعقد ہوئی۔
ترجمان پاک بحریہ کے مطابق یوم گوادر کی مناسبت سے مختلف تقریبات کا اہتمام کیا گیا،کمانڈر کوسٹ وائس ایڈمرل زاہد الیاس تقریب کے مہمان خصوصی تھے۔دیگر تقریبات میں بوٹ ریلی،پاکستان نیوی ہیلی کاپٹرز اور ایس ایس جی کمانڈوز کی پیشہ ورانہ تربیت کا عملی مظاہرہ شامل تھا۔
ترجمان پاک بحریہ کے مطابق گوادر 1958 میں پاکستان کا حصہ بنا،گوادر میں پہلی بار پاکستان کا پرچم لہرانے کا اعزاز بھی پاک بحریہ کی پلاٹون کو حاصل ہے۔پاک بحریہ گوادر کے عوام اور ساحلی پٹی کی خوشحالی کے لئے پر عزم ہے۔
مقامی افراد اور معززین کی بڑی تعداد نے بھرپور جوش وخروش سے ان تقریبات میں شرکت کی۔
اے پی پی /ڈیسک/قرۃالعین
