پشاور،25 دسمبر(اے پی پی): وزیر اعلی خیبر پختونخوا محمود خان نے کہا ہے کہ صوبے میں جاری ترقیاتی منصوبوں کی تکمیل اولین ترجیح ہے۔انہوں نے ضلع اپر چترال میں پولیس کی نئی آسامیوں کی تخلیق کے لیے ایس این ایز جلد منظور کرنے اور اپر دیر اور لوئر چترال کے ہیڈکوارٹرز میں واٹر سپلائی سکیمیں شروع کرنے کے لئے فیزیبلٹی اسٹڈی کرنے کی ہدایت کردی۔
وزیر اعلی خیبر پختونخوا محمود خان ملاکنڈ ریجن کے حوالے سے اجلاس کی صدارت کر رہے تھے جس میں ملاکنڈ ریجن میں جاری ترقیاتی منصوبوں پر پیشرفت اور عوامی مسائل کے حل کے لئے اقدامات کا جائزہ اور عوامی نمائندوں کی طرف سے اپنے حلقوں میں عوامی مسائل کی نشاندہی کرنیکی بات ہوئی۔
اجلاس میں وزیر اعلی نے متعلقہ حکام کو ان مسائل کے حل کے سلسلے میں ٹھوس پیشرفت کے لئے ایک مہینے کا وقت دیا اور ساتھ ہی ملاکنڈ ، ہزارہ اور ساوتھ میں ریجنل سطح کے اسٹیٹ آف دی آرٹ ہسپتال قائم کرنے کے لیے موزوں زمینوں کی نشاندہی کرنے اور تمام ورکس ڈیپارٹمنٹس میں انجنئیرز اور دیگر تکنیکی عملے کی کمی کو فوری دور کرنے کے لئے خصوصی اجلاس بلانے کی ہدایت جاری کیں۔
وزیر اعلی نے ضلع چترال سمیت دیگر اضلاع میں سیٹلمنٹ سے متعلق معاملات کے حل کے لئے ریونیو کے حکام کا الگ اجلاس طلب کرنے اور سی اینڈ ڈبلیو کے تحت بننے والی تمام سڑکوں اور پلوں کی مانیڑنگ رپورٹ پیش کرنے کی ہدایت کی۔
وزیراعلی محمود خان نے اجلاس کو ہدایت کی کہ کیڈٹ کالج اپر دیر کے قیام کے لئے متعلقہ منتخب عوامی نمائندوں کی مشاورت سے موزوں زمین کی نشاندہی کرنے اور تمام ڈسٹرکٹ ہیڈکوارٹر ہسپتالوں کو بجلی کی ایکسپریس لائن کی فراہمی کے لئے منصوبہ تیار کیا جائے ۔
اجلاس میں ملاکنڈ سے تعلق رکھنے والے ممبران صوبائی اسمبلی کے علاوہ صوبائی اور وفاقی محکموں کے اعلی حکام نے شرکت کی۔
