پشاور،22 دسمبر(اے پی پی): کیپٹل سٹی پولیس پشاور نے کینٹ ڈویژن میں خصوصی کریک ڈاون کے دوران موٹر کار چوری میں ملوث گینگز کا سراغ لگا کر 5 ملزمان کو گرفتار کر لیا، گرفتار ملزمان میں مسروقہ گاڑیوں کے لین دین کرنے والے ملزمان بھی شامل ہیں ،تمام گرفتار ملزمان کے قبضہ سے8عدد مسروقہ موٹر کاریں اور ایک عدد سوزوکی کیری ڈبہ،گاڑیوں کی جعلی رجسٹر یشن، جعلی اسلحہ لائسنس ،جعلی پر مٹ اور جعلی ٹرانسفر لیٹر برآمد کر لئے گئے ہیں ،خصوصی کریک ڈاون میں کینٹ ڈویژن پولیس اور انٹی کار لفٹنگ سیل نے حصہ لیا ہے ، گرفتار ملزمان نے ابتدائی تفتیش کے دوران موٹر کار چوری اور مسروقہ گاڑیوں کا لین دین کرنے سمیت مسروقہ گاڑیوں میں ٹمپرنگ اور جعلی کاغذات بنوانے کے بعد ملک کے دیگر حصوں میں فروخت کرنے کا اعتراف کر لیا ہے جن کے خلاف مقدمات درج کرکے تفتیش شروع کر دی گئی ہے
تفصیلات کے مطابق سی سی پی او عباس احسن کی خصوصی ہدایت پر ایس ایس پی آپریشن منصور آمان کی نگرانی میں ایس پی کینٹ محمد طاہر شا ہ وزیر کی سربراہی میں کینٹ ڈویژن پولیس اور انٹی کار لفٹنگ سیل انچارج شکیل خان کی جانب سے ہونے والی خصوصی کارروائیوں میں 4 ملزمان علی رضا ولد جاوید خان سکنہ مردان، مختیار علی ولد کریم خان ،ولی محمد ولد صالح محمداور نعیم شاہ ولد عجب خان سا کنان چار سدہ سے 8 عدد مسروقہ موٹر کاریں اور ایک عدد سوزوکی کیری ڈبہ برآمد کر لی گئی ہیں ،گرفتار ہونے والے ملزمان نے ابتدائی تفتیش کے دوران مسروقہ گاڑیوں کا کاروبار کرنے کا اعترف کرتے ہوئے ملزمان نے مسروقہ گاڑیوں کو ٹمپرنگ اور جعلی کاغذات بنوانے کے بعد ملک کے دیگر حصوں میں فروخت کرنے کا بھی انکشاف کیا ہے گرفتار ہونے والے ملزمان چلان عدا لت کر کے جیل بھیج دئے گئے ہیں ، ملزمان کی نشاندہی پر تفتیش کا دائرہ مزید وسیع کرتے ہوئے گینگ کے دیگر ارکان کے خلاف بھی کارروائی کا آغاز کر دیا گیا ہے
اس کے علا وہ ایک اور ملز م محمد شفیق ولد شیر افضل سکنہ جان آباد مردان کو بھی گرفتار کر لیا گیا ہے ،جس کے قبضے سے 25 عدد مختلف سرکاری محکمو ں کے جعلی مہر یں ،8 عدد مختلف گاڑیوں کی جعلی رجسٹر یشن،2 عدد جعلی اسلحہ لائسنس ،2 عدد پر مٹ،ایک جعلی ٹر انسفر لیٹر برآمد کر لی گئی ہے، ملزم کے خلاف مقدمہ درج کر کے تفتیش شروع کر دی گئی ہے۔
