نارووال،01 دسمبر( اے پی پی):وزیر اعلی پنجاب کی ہدایت پر ڈپٹی کمشنر نارووال ظہیر حسن کی زیرنگرانی ضلع کی تینوں تحصیلوں میں کھلی کچہری( بسلسلہ حصول ریونیو ریکارڈ )کا انعقاد کیا گیا۔
اس حوالے سے ڈپٹی کمشنر نارووال ظہیر حسن نے تحصیل ہیڈ کواٹرز کمپلیکس نارووال میں ریونیو کھلی کچہری میں آنے والے سائلین کی شکایات کو سنا اور موقع پر ان کے فوری ازالے کے لئے متعلقہ افسران کو احکامات کیے ۔
ڈی سی ظہیر حسن نے کھلی کچہری میں آنے والے سائلین سے خطاب کرتے ہوئے کہا کہ وزیر اعلی پنجاب کی خصوصی ہدایت پر ماہانہ ریونیو عوامی خدمت کچہری کے انعقاد سے لوگوں کو روز مرہ کے معاملات وراثتی انتقالات، فرد و رجسٹریشن،ناجائز قبضہ،ڈومی سائل کے حصول کے علاوہ دیگر مسائل کو حل کرنے میں بھرپور مدد مل رہی ہے، عوامی شکایات کے فوری ازالے کے لئے ڈپٹی کمشنر سے لے کر ریونیو افسران سمیت پٹواری تک ایک چھت تلے موجود ہیں ۔
ڈی سی نے ریونیو افسران کو ہدایت کی کہ وہ لوگوں کے مسائل کے فوری ازالے کے لئے اپنے آپ کو وقف کریں اور شہریوں کی شکایات کو ترجیحی بنیادوں پر حل کریں، اس حوالے سے کسی قسم کی غفلت برداشت نہیں کی جائے گی کیونکہ لوگوں کے مسائل کا فوری ازالہ حکومت کی اولین ترجیح ہے۔
انہوں نے کہا کہ قبضہ مافیا کے دن گنے جاچکے ہیں اور حکومت بلاتفریق قبضہ مافیا کے خلاف کاروائی عمل میں لائے گی، اس سلسلہ میں جلد ہی کریک ڈاون شروع کیا جارھا ہے ۔
ڈپٹی کمشنر نارووال نے ریونیو عملہ کو ہدایت کی کہ وہ عوامی شکایات کے فوری ازالے کے لئے بلاخوف و خطر کام کریں۔
اس موقع پر اے ڈی سی آر عائشہ غضنفر، اسسٹنٹ کمشنر نارووال سیدہ تہنیت بخاری،تحصیلدار رائے محمد حسین نواز سمیت تمام متعلقہ ریونیو افسران بھی موجود تھے۔
