اسلام آباد،22 دسمبر (اے پی پی):وزیر داخلہ شیخ رشید احمد سے پاکستان میں متحدہ عرب امارات کے سفیر حماد عبید ابراہیم الزابی نے منگل کو یہاں ملاقات کی۔جس دوران پاکستان – یو اے ای تعلقات، یو اے ای میں پاکستانی کمیونٹی اور پاکستانی شہریوں پر حالیہ ویزہ پابندی سےمتعلق بات چیت کی گئی اور عرب امارات میں پاکستانی قیدیوں کی جلد سے جلد بازیابی کے لئے تعاون بڑھانے پر زور دیا گیا۔
وزیر داخلہ شیخ رشید احمد نے کہا کہ پاکستان اورعرب امارات کے درمیان دیرینہ تعلقات ہیں، پاکستانی شہریوں پر ویزہ پابندی کا جلد از جلد خاتمہ ہونا چاہئے۔
متحدہ عرب امارات کے سفیر نے کہا کہ پاکستانی شہریوں پر یو اے ای ویزہ پابندی عارضی ہے۔انہوں نے یقین دہانی کاروائی کہ ویزہ بحالی سے متعلق بات چیت جاری ہے۔ امید ہے ویزہ بحالی جلدممکن ہوجائے گی۔
شیخ رشید احمد نے کہا کہ عرب امارات میں پندرہ لاکھ پاکستانی ورکرز قیمتی اثاثہ ہیں، سالانہ تقریباً 5 ارب ڈالر زرمبادلہ پاکستان بھیجتے ہیں، ان کی دیکھ بھال ہماری مشترکہ ذمہ داری ہے۔انہوں نے کہا کہ عرب امارات میں قید پاکستانیوں کو جلد لانے کے اقدامات پر یو اے ای حکومت کا تعاون درکار ہوگا۔
وزیر داخلہ نے کہا کہ پاکستان اور عرب امارات کے درمیان تعلقات باہمی بھائی چارےاورمحبت پر مبنی ہیں، باہمی تعلقات کے مزید فروغ کےلئے کوششیں جاری رکھیں گے۔
متحدہ عرب امارات کے سفیر نے کہا کہ عرب امارات کی ترقی میں پاکستانی کمیونٹی کا کردار مثالی ہے،ان کی دیکھ بھال ہماری ترجیحات میں شامل ہے۔انہوں نے کہا کہ وزیراعظم عمران خان کے دور حکومت میں پاکستان اور عرب امارات کے درمیان تعلقات میں بہتری آئی ہے۔
عرب امارات کے سفیر نے شیخ رشید احمد کو وزارت داخلہ کا چارج سنبھالنے پر مبارکباد دی اوران کی کامیابی کے لئے نیک خواہشات کا اظہار کیا۔
ملاقات میں سیکرٹری داخلہ یوسف نسیم کھوکھر بھی موجود تھے۔
