اسلام آباد، 08 دسمبر (اے پی پی):وزیراعظم کے معاون خصوصی برائے قومی صحت ڈاکٹر فیصل سلطان نے کہا ہے کہ کورونا وائرس کی وبا کی دوسری لہر تیزی سے پھیل رہی ہے،پچھلے 24 گھنٹوں کے دوران 89 اموات ریکارڈ کی گئیں جو کہ گزشتہ عرصے میں سب سے زیادہ ہیں۔
نیشنل کمانڈ اینڈ آپریشن (این سی او سی)میں میڈیا سے بات چیت کرتے ہوئے انہوں نے کہا کہ کورونا کی دوسری لہر گزشتہ لہر سے کہیں زیادہ مہلک ہے۔اس سے ہماری معیشت ، تعلیم اور صحت کی دیکھ بھال بری طرح متاثر ہوسکتی ہے۔انہوں نے کہا کہ دوسری لہر نے انفرادی اور اجتماعی طور پر ہماری زندگیوں کو متاثر کیا۔پہلی لہر کے دوران سائنسی انداز اور طریقوں سے کورونا وائرس پر قابو پانے میں مدد ملی۔
معاون خصوصی نے کہا کہ ہم این سی او سی کے پلیٹ فارم سے تمام اسٹیک ہولڈرز سے کورونا ایس او پیز پر عمل کی درخواست کرتے ہیں۔باہر نکلتے وقت ماسک پہنیں ، بھیڑ والی جگہوں سے گریز کریں ، ہاتھ دھوئیں اور معاشرتی فاصلہ کو یقینی بنائیں۔انہوں نے تمام محکموں سے درخواست کی جاتی ہے کہ وہ اپنے عملہ اور دفاتر میں ایس او پیز کو یقینی بنائیں۔
انہوں نے کہا ہے کہ اگر احتیاطی تدابیر پر عمل کرتے ہیں تو جس طرح سے ہم نے پہلی لہر پر قابو پایا تھا ایسے ہی ہم دوسری لہر کے پھیلاؤ کو کم کرنے میں کامیاب ہو سکیں گے۔
