اسلام آباد،30 دسمبر (اے پی پی ): وزیرِ اعظم عمران خان نے ہدایت کی ہے کہ گھریلو صارفین کیلئے ریلیف اور صنعتوں کو بلاتعطل اور سستی بجلی کی فراہمی کو حکومتی ترجیحات میں سرفہرست رکھا جائے اور توانائی کے شعبہ میں مستقبل کی ضروریات کو مدنظر رکھتے ہوئے دیرپا اصلاحات کی جائیں۔
ان خیالات کا اظہار انہوں نے بدھ کو اپنی زیر صدارت توانائی شعبے کے جائزہ اجلا س سے خطاب کرتے ہوئے کیا۔ اجلاس میں وزیرِ اعظم کو توانائی کے شعبے کے حوالے سے بریفنگ دی گئی، بجلی کی پیداوار اور ترسیل کی بہتری اور انرجی مکس کو بہتر اور ماحول دوست بنانے کے ساتھ ساتھ سستی بجلی بنانے کے مجوزہ منصوبوں پر بھی تفصیلی گفتگو ہوئی۔ اس کے علاوہ جاری منصوبوں پر پیشرفت سے بھی اجلاس کو آگاہ کیا گیا۔
وزیرِ اعظم کو گذشتہ حکومتوں کی طرف سے کئے گئے معاہدوں اور ان کے معیشت اور عام آدمی پر منفی اثرات سے بھی آگاہ کیا گیا۔ وزیرِ اعظم کو حکومت کی طرف سے کورونا وائرس کی وبا کے باوجود صنعت اور عام آدمی کے ریلیف کیلئے اٹھائے گئے اقدامات کے بارے بھی بتایا گیا۔
وزیرِ اعظم نے توانائی شعبے کی اصلاحات پر اطمینان کا اظہار کرتے ہوئے گھریلو صارفین کے ریلیف اور صنعتوں کو بلاتعطل اور سستی بجلی کی فراہمی کو حکومت کی ترجیحات میں سر فہرست رکھنے کی ہدایت کی۔ وزیرِ اعظم نے اصلاحات کو دیر پا اور ان میں مستقبل کی ضروریات کو مد نظر رکھنے پر بھی زور دیا۔
اجلاس میں وفاقی وزراء عمر ایوب، مخدوم خسرو بختیار، ڈاکٹر عبدالحفیظ شیخ، حماد اظہر، معاونینِ خصوصی تابش گوہر، ندیم بابر، وقار مسعود اور متعلقہ اعلی افسران نے شرکت کی۔
