سکھر،06دسمبر(اے پی پی):ملک کے دیگرشہروں خصوصاً سندھ بھر کی طرح سکھر میں بھی سندھ کے ثقافتی دن کے موقع پر یوم ثقافت نہایت جوش و خروش کیساتھ منایا گیا ہے ۔اس حوالے سے سکھر اور اسکے گرد نواح کی مختلف سیا سی و سماجی تنظیموں کی جانب سے ریلیاں نکالی گئی جو شہر کے مختلف علاقوں کا گشت کرتے ہوئے پریس کلب کے سامنے مرکزی تقریب میں شامل ہوئی۔
ریلیوں کے شرکاءنے کندھوں پر سندھی اجرک اور سر پر سندھی ٹوپیاں پہن رکھی تھیں، شرکاءریلی سندھی گیتوں اور ڈھول کی تھاپ پر والہانہ رقص کرتے ہوئے سندھ سے اپنی محبت کا اظہار کیا۔
ریلیوں میں شریک چھوٹے بچوں اور بچیوں نے بھی سندھی لباس پہنے ٹوپی اجرک اوڑھے شرکت کی اور اپنی خوشی کا اظہار کیا۔
اس حوالے سے شہید دودو سومرو ویلفئیر آرگنائزیشن کی جانب سے صوبائی رہنما نظام الدین سومرو جبکہ مختلف قومپرست تنظیموں سمیت سماجی و سیاسی جماعتوں کی جانب سے رات دیر گئے تک ریلیاں نکالنے کا سلسلہ جاری رہا ،سکھر پریس کلب کے سامنے منعقد مرکزی تقریب میں سندھ کے نامور فنکاروں نے اپنے فن کا مظاہرہ کرتے ہوئے سندھی گیت پیش کئے جس پر فضاءجئے سندھ جئے سندھ وارا جئیں کے نعروں سے گونج اٹھی۔
اس موقع پر ریلی کے شرکا ء کا کہنا تھا کہ آج کا دن عید سے کم نہیں ہے سندھ ثقافت کادن منانے کا مقصد دنیا کو سندھی ثقافت سے روشناس کرانا اور اپنی نوجوان نسل میں اس کے حوالے سے شعور اجا گر کرنا ہے کہ جو قومیں اپنی ثقافت کو بھول جا تی ہیں وہ زندہ نہیں رہتیں انہیں اپنی ثقافت کو نہیں بھولنا چاہیے۔
