لاہور29جنوری(اے پی پی): صوبائی وزیر صنعت و تجارت میاں اسلم اقبال نے کہا کہ گزشتہ اڑھائی سالوں میں صنعتی مراکز میں نئی صنعتیں لگنے سے روزگار کے ہزاروں نئے مواقع پیدا ہوئے ہیں،حکومت کی صنعت دوست پالیسیاں بار آور ثابت ہو رہی ہیں۔
ان خیالات کا اظہار صوبائی وزیر نے جمعہ کو یہاں سول سیکرٹریٹ میں اجلاس کی صدارت کرتے ہوئے کیا، اجلاس میں
پیڈمک کے زیر انتظام صنعتی مراکز کی کالونائزیش، ترقیاتی امور ،انفراسٹرکچر کی فراہمی اور دیگر انتظامی ومالی امور کاجائزہ لیا گیا ۔اس کے علاوہ سندر انڈسٹریل اسٹیٹ کی توسیع کی اصولی منظوری بھی کی گئی ۔
صوبائی وزیر نے آئندہ اجلاس میں توسیع کا قابل عمل ماڈل تیار کرکے پیش کرنے کی ہدایت دی۔
صوبائی وزیر میاں اسلم اقبال نے کہا کہ سندر انڈسٹریل اسٹیٹ میں ایک سال کے اندر 71نئے صنعتی یونٹس لگ چکے ہیں۔شیخوپورہ پورہ میں موٹر وے کے نزدیک قائد اعظم بزنس پارک کے منصوبے پر تیزی سے کام جاری ہے۔انٹرچینج کی تعمیر، لیبر کالونی، بزنس سینٹر اور انفراسٹرکچر کی فراہمی کے منصوبے ٹائم لائن کے اندر مکمل کئے جائیں گے۔انہوں نے کہا کہ عالمی معیار کے انفراسٹرکچر کیال فراہمی سے صنعتی مراکز کی آباد کاری کا عمل تیز ہوگا جبکہ کاروبار میں آسانیاں پیدا کرنے اور سرمایہ کار دوست پالیسیوں سے صوبے میں صنعت کاری کا عمل تیز ہوا ہے۔
اس موقع پر سید نبیل ہاشمی نے کہا کہ فریش گریجوایٹس کیلئے 3ماہ اور ایک سال پر محیط انٹرن شپ پروگرام شروع کیا جارہا ہے،انٹرن شپ پروگرام میں حصہ لینے والے امیدواروں کو معقول معاوضہ بھی دیا جائے گا۔
سیکرٹری صنعت و تجارت واصف خورشید ،چئیرمین پیڈمک سئید نبیل ھاشمی ،سی ای او جاوید الیاس، ممبر بورڈ عارف قاسم اور متعلقہ افسران نے اجلاس میں شرکت کی۔
