ساہیوال،29جنوری (اے پی پی):وزیر اعظم عمران خان نے قبضہ گروپوں کے خلاف کارروائی پر پنجاب حکومت مبارکباد دیتے ہوئے کہا ہے کہ وزیراعلیٰ پنجاب نے قبضے ختم کراکے جہاد کیا ہے، قانون کی بالادستی سے خوشحالی آتی ہے، بڑے بڑے ڈاکوئوں پر ہاتھ ڈالنا تبدیلی ہے، اب کوئی بڑا ڈاکو یہ نہیں کہہ سکتا کہ این آر او دو ورنہ حکومت گرا دوں گا، پنجاب بھر کے عوام کو ہیلتھ اور انشورنس کی سہولت فراہم کی جائے گی، صحت کے علاوہ تعلیم کے سرکاری شعبہ کو بھی بہتر بنایا جائے گا، رواں سال بلدیاتی الیکشن ہوں گے جس سے مقامی سطح پر مسائل حل ہوں گے، ساہیوال میں انڈسٹریل اسٹیٹ بنائی جائے گی، مقامی طور پر تیار کردہ سیوریج ٹریٹمنٹ پلانٹس لگائے جائیں گے، زرعی شعبہ میں جدید ٹیکنالوجی متعارف کرائی جائے گی۔ ان خیالات کا اظہار انہوں نے جمعہ کو یہاں احساس اور کامیاب جوان پروگرام کے تحت چیک تقسیم کرنے کی تقریب سے خطاب کرتے ہوئے کیا۔ وزیراعظم عمران خان نے وزیراعلیٰ پنجاب عثمان بزدار اور ان کی ٹیم کو قبضہ گروپوں کے خلاف کارروائی پر مبارکباد دیتے ہوئے کہا کہ جس طرح انہوں نے قبضہ گروپ کے محل گرائے ہیں اس پر وہ مبارکباد کے مستحق ہیں، قبضہ گروپ ایک لعنت ہے جو غریبوں اور بیرون ملک پاکستانیوں کی زمینوں پر قبضہ کرتے ہیں اور انہیں ان کی محنت کی کمائی سے محروم کرتے ہیں، لوگ قبضہ گروپوں کے آگے بے بس ہوتے تھے۔ وزیراعظم نے کہا کہ ان کی حکومت صنعتوں کے فروغ کیلئے کوشاں ہے، گوجرانوالہ، فیصل آباد اور سیالکوٹ میں ٹیکسٹائل کے شعبہ کیلئے کارکن نہیں مل رہے، کنسٹرکشن کا شعبہ بھی بہت ترقی کر رہا ہے، ساہیوال میں ایسی صنعتیں لائیں گے جن سے زراعت کو بھی فائدہ ہو، اس سلسلہ میں زمین کی نشاندہی کر لی گئی ہے، حکومت زرعی شعبہ کیلئے چین کے اشتراک سے طویل المدت اہم پالیسیاں متعارف کرائے گی، چین ریسرچ کے شعبہ میں بہت آگے ہے، ساہیوال کی گائے دودھ کے حوالہ سے مشہور ہے لیکن چین نے ریسرچ کی ہے اور وہاں گائے 6 گنا زیادہ دودھ دیتی ہیں، ہمیں چین سے استفادہ کرنا ہے، ہم زرعی شعبہ کو اٹھانے کیلئے ٹیکنالوجی کی طرف جائیں گے، 60ءکی دہائی کے بعد صنعت اور زراعت کے شعبوں پر توجہ دی گئی ہے۔ قبل ازیں وزیراعظم نے احساس اور کامیاب جوان پروگرام کے تحت نوجوانوں میں چیک اور کسانوں میں ٹریکٹر کی چابیاں بھی تقسیم کیں۔ تقریب سے خطاب کرتے ہوئے وزیراعظم کے مشیر برائے موسمیاتی تبدیلی ملک امین اسلم نے کہا کہ سابق حکومت نے جو پالیسیاں بنائیں ان کا ملک کو نقصان ہوا، ساہیوال جو کہ ایک زرعی علاقہ ہے وہاں کوئلے کا پلانٹ لگا دیا گیا اور زرعی علاقے کو تباہ کر دیا گیا۔ ساہیوال میں کوئلے کے پلانٹ کے لئے بیرون ملک سے کوئلہ منگوایا گیا، وزیراعظم عمران خان نے کلین اینڈ انرجی منصوبے لانے کی ہدایت کی، چیچہ وطنی میں سینچوری بنائی جائے گی تاکہ وہاں درخت لگائے جائیں ، کوڑا کرکٹ اور فضلے کو ٹھکانے لگانے کے لئے پبلک پرائیویٹ پارٹنرشپ کے ذریعے نظام وضع کیاگیا ہے۔ انہوں نے کہا کہ اب پاکستان کی بنائی ہوئی مشینری کے ذریعے یہ کام ہو گا۔ اس طرح جو کام پہلے چار ارب میں ہوتا تھا اب 40 کروڑ میں ہو گا۔ کوڑا کرکٹ کی ر ی سائیکلنگ ہو گی اور زیرو ویسٹ ہو گا۔ یہ جدید ماڈل ساہیوال میں بھی شروع کیاجائے گا۔ یہ وزیراعظم عمران خان کا ویژن ہے۔ تقریب سے خطاب کرتے ہوئے وزیر اعظم کی معاون خصوصی برائے تخفیف غربت ڈاکٹر ثانیہ نشترنے کہا کہ ساہیوال میں بھی احساس پروگرام شروع کیا ہے ۔ حکومت نے اس پروگرام کے ذریعے ڈیڑھ کروڑ سے زائد خاندانوں کی کفالت کی ہے اور 180 ارب روپے تقسیم کئے گئے ہیں۔ 77 لاکھ خاندان پنجاب میں اس پروگرام سے مستفید ہوئے۔ وفاق نے پنجاب میں 92 ارب روپے دیئے۔ ساہیوال کے 5 لاکھ 4 ہزار گھرانے احساس پروگرام سے مستفید ہوئے۔ احساس کفالت ، احساس ایمرجنسی کیش، احساس بلاسود قرضے، پرائمری سکول بچوں کے وظائف ، انڈر گریجوایٹ سکالرشپ جیسے پروگرام چلائے جا رہے ہیں۔ خواتین نے احساس پروگرام کے ذریعے اپنے خاندان کو غربت سے نکالا۔ ہنر مندوں اور طلبا کو استفادہ کا موقع ملا۔ انہوں نے کہاکہ ریاست حق داروں کے ہاتھ میں اپنا حق دیتی توقومیں اسی طرح بنتی ہیں۔ تقریب سے خطاب کرتے ہوئے وزیر اعظم کے معاون خصوصی برائے امور نوجوانان عثمان ڈار نے کہا کہ پاکستان کے کسانوں کی طرف سے شکریہ ادا کرتا ہوں، کامیاب جوان پروگرام کا آغاز کر رہے ہیں جو پاکستان کی معیشت میں ریڑھ کی ہڈی کی حیثیت رکھتا ہے، پچھلے دس سالوں میں ماضی کی حکومتوں نے زراعت کے شعبہ کو بری طرح نظر انداز کیا گیا، ان دس سالوں میں کسانوں کا استحصال کیا گیا، پی ایم ایل این کے پانچ سالوں میں زراعت نے نہ ہونے کے برابر ترقی کی۔ پاکستان میں روزگار پیدا کرنے کے لئے چھوٹے اور درمیانے شعبے کی بات کریں تو یہ پاکستان میں روزگار پیدا کرنے کا سب سے بڑا انجن ہے اس انجن کو بری طرح نظر انداز کیا گیا۔ وزیراعظم کے مشکور ہیں کہ ان کی خاص ہدایات کی روشنی میں کامیاب کسان پروگرام ترتیب دیا، اس پروگرام سے کسانوں کو لائیو اسٹاک میں ایک کروڑ سے اڑھائی کروڑ تک آسان قرضے دیں گے، لائیو اسٹاک اور ڈیری فارم کے لئے بھی قرضے حاصل کر سکتے ہیں۔ وزیراعظم کی ہدایات کی روشنی میں ہم نے پسے ہوئے کمزور کسان کو اٹھانا ہے۔ انہوں نے کہاکہ ٹریکٹر کسان کا بنیادی ہتھیار ہے۔ کسی کمزور انسان کو ٹریکٹر لینے کی ضرورت ہوتی ہے تو اسے دس سے بارہ ایکڑ زمین رکھوانی پڑتی ہے، اسے معاوضہ بھی ادا کرنا پڑتا ہے، جن کسانوں کے پاس پٹے کی زمینیں ہیں ان کے لئے ٹریکٹر لینا خواب ہے، آج ساہیوال میں کسان ٹریکٹر کی چابیاں لینے جا رہے ہیں مجھے خوشی ہے کہ اس میں سے کسی ایک کو بھی اپنی زمین گروی نہیں رکھوانی پڑی، کسی کسان کو ڈیڑھ سے دو لاکھ روپے اضافی نہیں دینے پڑیں گے، جو کسان پٹے پر زمین کاشت کر رہے ہیں وہ بھی ٹریکٹر حاصل کر رہے ہیں۔ پہلے مرحلے میں پانچ ہزار ٹریکٹر دیئے جائیں گے، جو جو اس پروگرام کا حصہ بنے گا ہم کوشش کریں گے کہ اس کسان کو ٹریکٹر ملے۔ سرحد پار لاکھوں کسان سڑکوں پر ہیں، ان کا استحصال کیا جا رہا ہے جبکہ ہمارے ملک میں کسانوں کو ٹریکٹر دیئے جا رہے ہیں، ان کے لئے آسانیاں پیدا کی جا رہی ہیں۔ میں یقین دلاتا ہوں کہ وزیراعلیٰ پنجاب زبردست طریقے سے کام کر رہے ہیں، گنے کا ریٹ بھی بہتر بنایا جا رہا ہے۔ تقریب سے خطاب کرتے ہوئے وزیراعلیٰ پنجاب سردار عثمان بزدار نے کہا کہ وزیراعظم عمران خان صاحب سیالکوٹ میں اس کا افتتاح کر چکے ہیں آج ساہیوال میں 18 ارب روپے کی لاگت سے پروگرام شروع کر دیا گیا ہے۔ انہوں نے کہا کہ ساہیوال اور سیالکوٹ سمیت مزید سات شہریوں میں بہترین میونسپل سروسز کی فراہمی کی منصوبہ بندی کی جا رہی ہے۔ ساہیوال میں ویسٹ مینجمنٹ پلان شروع کر دیا گیا ہے، ہنر مند پروگرام کا آغاز کیا گیا ہے، اسی منصوبہ کا سنگ بنیاد رکھا گیا ہے۔ ساہیوال میں 120 بیڈ کے انسٹیٹیوٹ آف کارڈیالوجی کا سنگ بنیاد رکھا گیا ہے، پنجاب میں صحت سہولت کارڈ اور انصاف میڈیکل کارڈ کے اجراءکیا گیا ہے۔ دسمبر 2021ءتک صوبہ کے عوام کو مفت علاج کی سہولت میسر ہو گی یہ ایسا پروگرام ہے جس کی مثال نہیں ملتی۔ ماضی میں کسی نے لائیو سٹاک پالیسی نہیں بنائی، ہم پنجاب کی پہلی لائیو اسٹاک پالیسی تیار کر چکے ہیں بجٹ سے پہلے یہ منظور کر لی جائے گی۔ وزیراعظم سے گذارش ہے کہ سمندری انٹرچینج سے ساہیوال اور چیچہ وطنی سے رجانہ تک سڑک بنائی جائے۔ ڈویلپمنٹ پراجیکٹس کی تکمیل سے عوامی نمائندوں اور دیگر اسٹیک ہولڈرز سے رابطے رکھے جائیں گے جس سے علاقہ تیزی سے ترقی کرے گا۔ انہوں نے کہا کہ وزیراعظم عمران خان کا ساہیوال تشریف آوری پر شکریہ ادا کرتا ہوں، ان کی آمد ہماری حوصلہ افزائی کا باعث ہے۔
